الاعلام الرقمي مع سوداني وبتر لايف

اول يوم أدشن الكتابة في صحيفتي بين يديكم بعد استلامها من المهندس الذي قام بتصميمها امضيت نصف يوم وانا احاول نشر الخبر الأول حتي أصابني الإرهاق و(خليت الوراي والقدامي) وتفرغت تماما للمحاولات الفاشلة وفي كل مرة يحدث خطأ ما (مرة تروح مني علامة إضافة المقالة ومرات تروح مني المقالة في روحها واصابني الاحباط بل الاكتئاب ). المهم نجحت بعد (عيني وقعت زي ما بتقول حبوبة). الآن تجاوزنا عملية النشر هذه واصبحنا كالطلقة وبقينا في قصة المحتوى والمشاهدات او التفاعل مع ماينشر في الموقع الإلكتروني أو صفحة الموقع على فيس بوك تصدقو وتآمنو بالله التفاعل مع المحتويات الهادف تافه جدا
صراحة مصابة بالاحباط ما (اقولكمشي) اي إحباط؟ قاسي جدا.. لا أحد يتفاعل او يعلق بل حتى الأصدقاء المقربين لا يقرأون ولا يتفاعلون الا القلة القليلة منهم يجدعو ليك لايك وينبثقو على سبيل المجاملة اما الاغلبية فتبخل حتى بالمرور واللايك الذي لا يكلف سوي ضغطة أصبع.
هذا الحال ليس حصريا فقد كان محور الحديث في ورشة الإعلام الرقمي و صحافة الموبايل التي نظمتها شركة سوداني للاتصالات بالتعاون مع مركز بترلايف في إطار الشراكات التي ظلت شركة سوداني تقيمها مع المؤسسات التي يتفق طرحها مع توجه الشركة كما أفاد بذلك مسؤول الاتصال المؤسسي بالشركة الأستاذ ضياء الدين المصباح وتجئ هذه الشراكة باعتبار صحافة الموبايل شكل من أشكال الإعلام الجديد.
وحسب دراسة عن مؤشرات محرك البحث في المتصفحات استعرضها الأستاذ محمد السماني تصدرت عشة الجبل سجل التصفح ثم تلتها موضوعات لا تزيد عنها أهمية.! إذن أين المشكلة وقد اشتكي كل أصحاب المنصات الرقمية من بوار سلعهم مقابل مشاهدات وتفاعلات خرافية المحتويات اقل ما توصف به انها تافهة.
اذكر انني ايام أزمة الخبز تعلمت عواسة الكسرة وفي يوم نشرت عواستي في قروب (طقة) بالفيس.. ياخ الكسرة دي 15 يوم حايمة الحريم يعلقن ويتمطقن طبعا ديل المابعرفن يعوسن نهائي وزي ماقالو الطشاش في بلد العمى شوف. انا الآن ابحث عن نصف هذا العدد لصحيفتي!
لابد من صناعة محتوى يجبر الناس على التفاعل معه فإذا اختفى التافه فالمساحة ستكون متاحة الهادف ولعل هذه الورشة هي إحدى المجالات التي توظف فيها كل الأدوات لصناعة محتوى متعدد الأغراض حسب محمد السماني. ومن لا يتجدد بتبدد حسب رابح سليمان من مركز بتر لايف الذي أكد على ضرورة شراكات حقيقية تؤسس لإعلام رقمي مواكب للتطور الحاصل في العالم وهذه هي فكرة الورشة.
الدكتور ابوبكر الزاكي والله الراجل ده ماشاء الله علم يمشي على قدمين انا قاعدة الاقيهو في التغطيات لكن والله ماقيلاهو قدر ده.. ياخي ده جاي ومعاهو عدة الشغل (اللايفات) كاملة المايك بتطوراتَه حتى آخر تحديث
غايتو الا نخش لينا صندوق كبير حتى نجيبها. انا من بديت اشتغل بث مباشر عملت لي 4 لايفات اتنين ما بطالات والاتنين التانيات معولقات لكن حانتعلم اكيد طالما دكتور أبوبكر معانا وسيك سيك حانلصق فيك لم تكره اللصقات في حياتك..
أول مرة افوز بجائزة في حياتي المفكرة الذكية من سوداني فيها بور بنك وشواحن غايتو الا شرحوهن لي حتى عرفتهم بس الشاحن بتاع التلفون ابتفاحة مقرومة ده كان تجدعو معاهو التلفون لكن ما مشكلة المرة الجاية..قالو الولد ماشي مع ابوهو لقى ليهو نمرة عربية واقعة قال ليهو ابوي لقيت لي نمرة عربية الاب قال ليهو شيلها ياولدي وكت لقينا النمرة العربية هينة اها نحن كمان وكت لقينا الشاحن الايفون هين..
ناس البرستيج دكتور ابوبكر قال ليكم ابتفاحة مقرومة ده ما بنفع في شغل صحافة الموبايل ما بنفووووع مابنفع لعمل صحافة الموبايل اقعو السامسونات. الا بالحق التفاحة دي القرمها منَوو؟
شكرا سوداني شكرا بتر لايف منكم نستفيد.. وعميق الشكر الزميلين العزيزين صبري ورانيا.