وجه الحقيقة

هاجر سليمان تكتب .. احدث تقليعات الجرائم

الحياة اليوم

فى بحرى الدروشاب اتخذ صاحب منزل كافة تحوطاته بمعنى (عقلها واتوكل)، واغلق باب منزله من الداخل بطبلة بينما كانت ركشته تقبع بالحوش، ونام هو وابناؤه بسلام، ولكن اللصوص أبت أنفسهم الا ان يسطوا على ذلك المنزل رغم تأمينه المحكم، وبالفعل سطا اللصوص وبحثوا عما خف وزنه وغلى ثمنه فلم يجدوا شيئاً الا الركشة، فقرروا سرقتها وتوجهوا صوب الباب لكنهم فوجئوا به مغلقاً بطبلة خالى مفاتيح، فما كان منهم الا ان حملوا الركشة على اعناقهم ووضعوها اعلى سور الحائط، وتسور اثنان من اللصوص المنزل صوب الشارع وكان آخران يمسكان بالركشة من الداخل، وبينما هم يحاولون اخراجها وهى معلقة على السور، استيقظ سكان المنزل واستغاثوا ففر اللصوص جميعاً تاركين الركشة معلقة اعلى سور المنزل نصفها للخارج ونصفها للداخل، والجماعة بقوا فى الطريقة البينزلوا بيها الركشة، تفتكروا الحرامية العملوا العملية دى نصيحين؟ اكيد لا ديل شكلهم ضاربين كل انواع المخدرات والمهلوسات العقلية، بل حتى عقاقير توسعة الخيال ذااااتو غايتو جنس محن !!

(٢)
فى ام القرى الشاب حبيب محمد الحسن بينما كان يسير قريباً من منزله باغته ثلاثة اشخاص قالوا له بالحرف: (يا سان خت التلفون ده وامش) وكانوا مسلحين باسلحة بيضاء، ولكن (حبيب) حلف ما يخت تلفونو وقال ليهم بالحرف: (حرم ما بخت تلفونى .. لكن انتو تعالو شيلوهو)، احدهم تقدم صوبه فاخرج الجعلى سكيناً كانت بضراعه فلاذوا بالفرار .

)٣(
يقول ظريف المدينة ان ناس الحاج يوسف صعبين، ولو الكهرباء قطعت بالليل ديل ممكن هدومك يجازفوها منك، وده كلام حقيقي، فقبل ايام انقطع التيار الكهربائي، وبينما كان صبى فى طريقه الى الدكان برز له مسلح بسكين قال ليهو اقلع لى نعلينك ديل، فما كان من الصبى الا ان فتح وقام صوف وعينك ما تشوف الا النور .
(٤)
ناس الكلاكلات حلفوا طلاق اى تسعة طويلة يحرقوا موترو ولو كتر يحرقوهو هو ذاتو مع الموتر، وحقيقي ده المفروض يحصل.. سكينك فى ضراعك عصايتك في يدك مسدسك بالجمبة شغل (كابويات) بس يا مان، عشان ما فى زول يقدر عليك، واوعاكم من الشوارع المضلمة والشوارع خالى زقاقات، وأختوا ناس (البوكو) ديل ذاااااتهم ناس النهب يا خوانا، الشغلة دى فنياتا كترت بس اعملوا حسابكم .

)٥(
اللصوص البيتلبوا الحيط ديل (٩٩%) منهم خارشين وضاربين (بنقو) و (آيس) وكلو، وديل طبعاً بيجوك جاهزين ومستعدين يقتلوا عشان يسرقوا، وكمان شدة ما عينهم قوية فى واحدين يفتحوا التلاجة ويأكلوا، وكمان قبل كده حرامى بعد اكل وشرب العصير فات (دورة المياه) وعبر عن ارتياحه بشتى الطرق، وكانت شغلة مضرة عدييييل كده واتخارج
(٦)
ناس الجريف زمان كضاب حرامى بيجى يتجدع فى حلتهم، لانهم كانوا بيطبقوا نظريات ظابطة ضد الحرامية ديل، فيا ريت ترجع نظريات زمان دى عشان اى قرد يطلع جبلو واى فار يدخل جحرو، وجايينكم يا ناس الـ (…) ما تقولوا ناسينكم استعدوا لى وارجونى .
كسرة :
الغريبة ان ناس كده لمن يغيبوا الجماعة يحرشوا ليهم الكلبة، وناس كده يعملوا السبعة وذمتها ويثيروا الضجة ويخلقوا بلبلة، وبرضو الجماعة يدوهم حلاوة حربة، عليكم أمان الله دى مش مفارقات غريبة؟!

الانتباهة