وجه الحقيقة

فوكس/ هويدا حمزة / يامعلمات معلمين!!

يشهد الله انني حتى مغادرتي الصحيفة التي كنت أعمل بها قبل اقل من عام وهي الصحيفة الاولى في البلد كنت اتقاضى راتبا قدره تسعة آلاف جنيه و٦ الف خارج البي شيت تحايلا على التأمين الاجتماعي وحقوق الفصل التعسفي حين يقررون فصلي يعني ١٥ الف لا فوقا لا تحتا لصحفية مثلي بزخمها وسنوات خبرتها ولا كيس رمضان ما معاها ناهيك عن خروف العيد ولم اضرب يوما ومع ذلك فصلوني مع آخرين ظنا منهم انها كتيرة و(بتقد جيب المؤسسة الكبيرة )وهذا شأنهم والجريدة جريدتهم ومن قال حقي ما ظلم زي مايقولو وانا رزقي الله تكفل به فله الحمد والمنة والحمد لله الذي اعتقنا من ضيق العباد إلى براح رب العباد.
سقت هذه المقدمة توطئة للحديث عن الاضرابات..يا اخوانا في مهن كدة ما بنفع فيها الإضراب رغم قناعتنا بمشروعية مطالبهم فهي مهن انسانية بالمقام الاول كالطب بكل تخصصاته حتى الدايات والتعليم لأن المتضرر من الإضراب ليس الحكومة وحدها _ده لو في حكومة طبعا_ولكن هناك آخرين ليس لهم ذنب سوى أنهم مواطنين بهذا البلد المنكوب يعني انتو لم تضربو في مستشفيات الحكومة المساكين يمشو يتعالجو وين؟في الخاص؟الخاص ده شعرا ما عندهم ليهو رقبة اتخيل انه انت ما طبيب وامك أو ابوك مات لانه مالقى طبيب يعالجو لأنهم مضربين،احساسك نحو الأطباء حيكون شنو مهما كنت مؤمن بمطالبهم؟حا تكرههم وتدعي عليهم صاح؟في النهاية دي مهنة انسانية لو انت ماقدرها ولاقدر القسم الانت اقسمتو خت السماعة واتخارج غيرك منتظرين التعيين.
نجي للمعلمين..الله يكرم أستاذتنا الذين قاموا بتدريسنا في مختلف المراحل ولم يضربوا يوما رغم ان فطورهم لم يكن يخرج من دائرة الفول أو العدس _مازي طيبات هسة _ بل لم نكن قد سمعنا بكلمة إضراب من الأساس ولكن معلمين اليوم يضربون دون أن يطرف لهم جفن رغم الجهجهة التي أصابت التعليم كما أصابت غيره منذ سقوط الإنقاذ وتولي حكومة الكفوات أمر البلاد وأصبح التلاميذ يدرسون في صفوف متكدسة أو على دفعتين صباحية و مسائية تقومو انتو يالمعلمين مع احترامي ليكم تزيدو الطين بلة وتجهجهو باكات العام الدراسي اكتر مما هو مجهجه؟؟ليس العام الدراسي فحسب بل الأمهات أيضا.. الاولاد شغلوها ليهم وقد قالت لي إحدى الجارات (والله الشفع ديل تقول دفعتم لينا الحكومة مابندور قعادهم في البيت كلو كلو )!!وهم في الأساس لا يرغبون في الدراسة ولو ترك لهم الأمر لسعوا في الأرض يطلبون الرزق بدل القراية ام دق دي ولكن مجبور خادم الفكي على الصلاة .
بالنسبة لمطالبكم اننم تعلمون أن ان ميزانية العام ٢٠٢٣ قد وضعت وانتهت ولا مجال لزيادات الا في ميزانية العام القادم فهل ستضربون طوال العام؟اكيد لا ..كدي باصروها بي جاي وبي جاي خلو الأمور تمشي وانتو اساسا ما مقصرين شى دروس خصوصية وشي مدارس خاصة بالجابس كده ونحن عارفين لو ضاعفو لبكم ١٠٠٠%برضو شوية عليكم يا مشاعل النور لكن جبريل يجيب ليكم من وين حبايبي انا؟ الزول ده عصر على الجميع وليس انتم وحدكم يعنني زول يرفع الدعم من الخبز ومن الدواء راجيين منو شنو ؟انا ما حا نتكلم عن البنزين والجازولين ين لانه دي رفاهية حسب فهم الحكومة وما عاوزين نعمل بيها (دوشة ) لجبريل .. غايتو الله المستعان على جبريل ده والدخلت في البلد دي تختاهو.
دحين بالمعلمين ختو الرحمن في قلبكم وأفتحو المدارس ولا ختو الطباشيرة واتفكفكو غيركم منتظر التعيين وتذكروا أن من أخذ الأجر حاسبه الله بالعمل وأي زول مضرب مفروض يوقفو مرتبو كان كتير كان شوية.