وجه الحقيقة

فوكس/ هويدا حمزة/ عاجل إلى شركات الإتصالات والبنوك

غايتو زين اثبتت انها نمبر ون وإنها فعلا عالم جميل رغم غلاء أسعارها ولكن الرخيس بي رخستو يضوقك مغستو والغالي بي غلاتو يضوقك حلاتو ..بالنسبة لي شخصيا الاتنين ضقتهن
صحيح نستطيع أن نواصل عملنا في صحفنا الاكترونية ولكن العثور على رصيد أصبح هما كبيرا لدرجة ان اصبحنا رمتالين حتى ناس برة السودان نطلب منهم يحولو لينا رصيد أعطونا أو منعونا.خ
اصعب حاجة انه الواحد يكون تم شهر بدون يسمع صوت امو وابوهو البعيدين لأنه النت المجاني ما بكلم ولا برسل تسجيلات صوتية ولا فيديوهات يعني شغل طرش وعمايا الله يكرم السامعين.يعني يازين كان تكملو جميلكم وان شالله تدينونا ولا تورونا نجبد من وين زي ما ناس الكهربا عملو. السؤال ليخ زين شغالة والتانيين لا
أيضا لن تكون زين وحدها قادرة على العبور بزبائنها لأن شركتي سوداني وام تي ان خرجتا من الخدمة منذ بداية الحرب ولليلة ما قادرين يرجعوها يعني انا لو عندى شريحة زين وامي عندها اريبا مابقدر اطمن عليها.ما عارفين المشكلة وين؟
مش كدة بس لو عاوز تبر اهلك او عاوز تعمل فحص طبي أو تقابل دكتور لو لقيت مركز فاتح ما حتقدر لأنه قروشك في البنك والبنك ماشغال والتطبيقات متعطلة وانت شغال تأكل من سنامك بعدما قضيت على الكاش المعاك 😪.
قبل قليل تواصلت معي احداهن تسال عن دواء الغلفيك ١٠٠ملج لمرضى سرطان الدم وقالت لي أن برج الأمل هو الوحيد الذي يجلب هذا الدواء الذي يوزع لهم مجانا ولكن كيف الوصول لبرج الأمل ؟.صديقتي الدكتورة قالت لي (منظمة الجباب هي الوحيدة البتجيب الدواء لبرج الامل والآن ناس الدعم السريع بياكلو فيهو على اساس انه حلاوة شكلت )😪
قمة الإحباط أليس كذلك؟
على شركات الإتصالات والبنوك أن تستغل فترة الهدنة بي خروقاتها دي وتصلح ما افسدته الحرب وإلا ترا نحن كان قمنا صعبين.هييع

ملحوظة:بعد أن اكملت كتابة هذا المقال وتجهت لنشره في الموقع قطعت الكهرباء ومن ثم طشت طشت الشبكة طشة واحدة من العصر الا جات ١٠ بالليل وئ
..قالو الشكروه رقد!!😪