وجه الحقيقة

شباب الفيحاء ..رجولة فايدة الحد

الحياة اليوم


شعر شباب حي الفيحاء بشرق النيل بالنشوة وهم يتداولون قرار وزير الدفاع بإعلان التعبئة العامة وتسليح ضباط الجيش المتقاعدين وكل من يستطيع حمل السلاح للدفاع عن نفسه وأسرته وشرف اخواته وبنوت فريقو بعد أن نقلت المليشيا المتمردة الحرب من الميدان إلى الاحياء والبيوت ،ومبعث نشوتهم أن أولئك الشفوت سبقوا الوزير وأستنفروا بعضهم لحراسة الحي وحرائره في دوريات ليلية يطوفون بالحي شارع شارع وزنقة زنقة لا تشتهي عيونهم النوم بسبب حرارة قلوبهم (عشا البايتات ده اخوك يابنية بريدو انا والله عالم بية ) وكم من حرامي ولى الدبر من أمامهم..احس الشباب انهم ماشين صاح وان قرار الوزير جا عشان يقول ليهم (قدام )ولكن واه من لكن هذه..مش في زول كدة الناس بقولو ليهو هازم اللذات؟بس ياهو عمنا ده ورغم إنه لواء شرطة متقاعد وكان أولى به أن يحمل السلاح دون توجيه إلا أنه صدمهم بقوله (ياشباب مافي جيش ولا شرطة بتجيك في البيت عشان تحميك كده انا اتفاهمت مع ضابط ارتكاز ١٣ بتاع الدعم السريع عشان يجو يحرسونا )طاااخ
عينك ما تشوف الا النور الشباب ردمو ليك عمك ردم الجن!!دعم سريع يحرسونا نحن؟!!!ونحن قاعدين نسوي شنو )؟واتهموه بأنه يحاول تبييض ما ء وجه الدعامةوهذا مضيعة للزمن مخطئ من ظن يوما ان للثعلب دينا ديل بتحورو زي الحربوية وبعملو فيها مساكين جز ركب كشح بس مافي ادنى رحمة معاهم العملو في الناس ما شوية هم حتي لو ما سرقو في الاحياء الاخري كسرو الكوالين والطبل وخلو النيقرز ينهبو الادوات الكهربائية المابحلمو يشتروها لي يوم الدين فالله الله الحذر الحذر)
الشباب طلبو من عمك سحب حديثه ومغادرة القروب فاعتذر وغادر.
حالة الرجل ليست استثناء من حالات كثيرة كثر الحديث عنها في الميديا عن مصادر بالأحياء يرشدون عن جيرانهم ويقولون هذا ضابط وهذا كوز نظير حفنة دنانير لا تساوي شيئا في مقابل الرجولة والوطنية. ياخ ستات شاي قالو بقن مصادر للدعامة يشربو الشاي معاها ويملوها قروش ويشتتو !!أنس عمر قالو وصفتو ست شاي لا يستحق.
مثل هذا الرجل لايستحق حتى التعليق على كلامه ..وكلنا أمل في عودة الخرطوم أجمل مما كانت.
.