" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

إفادات هارب من قبضة الجنجويد..لبسونا كاكي الجيش وكتبو لينا في اللوحة
الحياة اليوم
عندنا ولدنا من الناس الكانو معتقلين عند الدعم السريع وقدر يهرب منهم بعدما كسرو باب الصالة الكانو معتقلين فيها
وقال انو المعتقل هو عبارة عن عمارة حقت زول مدني وطردو كل الناس الساكنين فيها
وكل المعتقلين شباب من سن ١٧عام والي ٣٠ عام
قال دقونا دق شديد وانحنا مكلبشين وبعدها فكو مننا الكلباش وجابوا لينا كاكي حق القوات المسلحة ولبسونا ليهو وصورونا فيديو علي اساس انحنا عساكر جيش تم القبض علينا وكدة
وقال انحنا كناس معتقلين اتعرفنا علي بعض ومالقينا واحد بالغلط من عساكر الجيش او تابع للشرطة او شخص نظامي يتبع لاي جها وكلنا مدنيين فقط
قال ناس الدعم السريع عندهم لوحة خشب من الفورمايكة وبيكتبوا فيهو الكلام العايزونو ويخلو الزول يقراهو وبالحرف وهم يوجهو الكاميرا عليهو وتصورو وهو بيتكلم اللوح خلف الكاميرا وبيقرا الكلام المكتوب ولازم اهم شي التمثيل يكون حقيقي والا بيوقفو التصوير ويجلدوه جلد شديد ويبدو التصوير من جديد
والله هذا ما قاله والله علي مااقوله شهيد
وولدنا ده شغال مكنيني في المنطقة الصناعية بالخرطوم وشوية كده هو بعيد عن التكنلوجيا والعولمة يعني ماعندو فيسبوك ولا بعرف الحاجات دي وحتي تلفونو البيستخدمو ربيكة ورابطو بي رينقه عشان البطارية ماتقع وشالوهو منو ناس الدعم السريع
وقلنا ليهو طيب نصورك فيديو وتحكي كلامك ده كلو وننشرو للناس في الفيس؟
قال لالا ماتصوروني لكن بعدين لمن البلد دي تروق ممكن امشي معاكم للشرطة وبحكي كل الحصل لي والمعناها الضوقناها وكل شي بحكيهو للمتحري
والان هو موجود مع اهلنا خارج الخرطوم ومعاهو تلاته من الاسري الاسروهم الجنجويد وقدرو هربوا معاهو وحاليآ قاعدين مع اهلنا ومتحفظين بيهم لغاية ما البلد تروق حتن يسافرو لاهلم
هلاصة الموضوع الجنجويد انتهو وكل مسرحياتهم اصبحت مكشوفة
وحتي اللواء طبيب القبطي القبضوهو ودقوهو وختو ليهو نفس اللوحه الفيها كلامهم واجبروه يقرأ الكلام وبالحرف واجبروه يمثل تمثيل جيد وده كان اتفاق بينهم ان ينفذه وبعدها يسلموه للصليب الاحمر
وكلكم ارجعو للفيديو حق اللواء طبيب وشوفوهو وحتلقوه انو بيتكلم وعيونو مركزة علي اتجاه واحد لانو بيقرأ الكلام المكتوب بقلم الشيني علي اللوحة..
واي زول جابوهو في لايف فيديو هم خاتين ليهو لوحة قدامو وفيها كلامهم الكاتبنو وهو يقراهو وبالحرف الواحد ولازم يمثل تمثيل حقيقي والا سيعذب ويبرح بالضرب ثم يعيدو تصوير الفيديو. منقول
