وجه الحقيقة

فوكس هويدا حمزة قال ليهم بلوكم؟فبلوهو😭

في قرية اللدية التابعة لجبل أولياء حيث يتمركز جزء مما تبقى من الدعامة في قرى المنطقة قام الدعامة بجلد أحد المواطنين يبدو أنه لم يكن في وعيه فوافته الشجاعة ليقول لهم (بلوكم)؟اها الجماعة ديل ما بدورو سيرة البل دي بتعمل ليهم سايكولوجي قامو طوالي رشوهو رصاص جابو أجلو ربنا يرحمو .صبيحة اليوم التالي سمع الناس بخبر عدد من الدعامة اختلف حول عددهم وقيل ٩ منحورين بإحدى قرى الجعليين بالمنطقة لاندري إن كان الفاعلين سكان المنطقة أو ناس العمل الخاص. ولكن عموما تسلم البطن الجابتهم .
الدعامة فزو من قلب الخرطوم إلى أطرافها على ظهر عدد قليل من التاتشرات لا يتجاوز ال٥ وليس ٨٠ أو ٩٠ كما تردد ودخلوا القرى وهم منكسي الرؤوس واستوطنوا بعض المنازل التي هجرها اهلها كما طلبوا من بعض الموجودين ملابس يتخارجو بيها نظير تسليمهم السلاح الذي يحملونه.
الجماعة بصلو مع ناس المنطقة في المسجد ويدعو ربنا يوقف الحرب!جديدة دي والله.🤣 ويدقو الباب ويشحدو الحريم الفضلن يعملن ليهم قهوة شفتو قوة العين
الرجال قالو ليهم حريمنا فزن كلهن مافي زول بعمل ليكم الجبنة و طلبوا منهم مغادرة القرى ليتسنى للسيدات العودة لمنازلهن التي تركنها مرغمات خائفات فكان رد الدعامة (نحن ما عاوزين نسأل لينا زول اطمنو).
احد المواطنين سكنوا قرب منزله فقرر الشردة فقالو له ما بنسألك لو عاوز تقعد اقعد ولو عاوز تمشي ا١١مشي بيتك في الحفظ والصون ولكن الرجل كان شفافا فقال لهم (بشتت طوالي الطيارة لو جات بتفرق بيني وبينكم فضحك الدعامة وهذا من عجائب الزمان.
المهم ياناس العمل الخاص والتحية لكم من هذا المنبر ناس القرى بجبل اولياء وانتو عارفنهم منتظرين زيارتكم ما تتأخرو لو تكرمتم عشان عاوزين يرجعو بيوتهم خاصة أنه الدكاكين الصغيرة في القرى قفلت والحصول على ضروريات الحياة أصبح صعبا في ظل عدم وجود الكاش.