وجه الحقيقة

فوكس/ هويدا حمزة/ ياهو ده جيشنا ونحن أهلو

1
اول أمس كتبت بزهج كده موجهة سؤال لقيادة جبل أولياء ليه ما عاوزين يحسمو المتمردين القاعدين في قرى ام ارضة بعدما طردو اهلها بالسلاح ؟ليه ما ترسلو ليهم العساكر الحايمين في سوق الجبل ومتكلين جنب ستات الشاي عشان يبلوهم ؟
ماعاوزة اقول الجيش استفزاهو كلامي واتحرك الا كان عاوزة افكها في نفسي ساي لكن بقول انا استعجلت الجيش بتحرك بخطة لكن كنت زعلانة شديد لأنه الدعامة مفرشين سرايرنا في حوشنا ومستمتعين بالطراوة يعني ما متدسيين في الغرف .
وفعلا الجيش كان متحرك في ذات الاتجاه ودق الدعامة حطب القيامة دق العيش وبلوهم في اللدية والسلمانية وعرفت انه اليوم اتواصل البل في بقية القرى الا اني ما قدرت اتاكد من الموقف بالضبط لأنه الشبكة مقطوعة من جبل اولياء .وان شاءالله نصر مبين في معسكر طيبة وما جاوره قادر يا كريم.
2
سعدنا بانتصار الجيش في المدرعات اللهم إنا استودعناك اياها واستودعناك بلدنا فاحفظها واحفظهم بما تحفظ به عبادك الصالحين .
3
سعدنا كذلك بنبأ اعتقال المتمرد سفيان بريمة وكنا نتمنى أن يشفع. الخبر بفيديو يوثق لحظة الإعتقال ليطمئن قلوبنا.
4

(مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ ۖ فَمِنْهُم مَّن قَضَىٰ نَحْبَهُ وَمِنْهُم مَّن يَنتَظِرُ ۖ وَمَا بَدَّلُوا تَبْدِيلًا (23)
صدق الله العظيم. المغفرة والرحمة واعالي الجنان لشهيد الواجب قائد الفرقة 16اللواء ياسر فضل الله الذي حفر قبره بيده كأنما أخبرته الملائكة انها ستزفه عريسا في الجنة فمات غدرا ممن طبعهم الغدر والخيانة ضاربا أروع الأمثال في الوطنية والنخوة والرجولة ولا عزاء لسفيان وكيكل ومن شايعهم من عبدة المال والدولار