فوكس/ هويدا حمزة / البرهان..قرط على كدة

اها يا يوسف عزت مش لو قلت الرووب ،البرهان كشح ليكم منبر جدة في وشكم وقفل بلف المفاوضات في كلمته أمام القمة السعودية الإفريقية اليوم شاكرا سعي السعودية الذي في ظاهره حميد وفي باطنه العكس ولو البرهان عملها يبقى ده ما البرهان ،مش بقولو ما تدي ضهرك للعسكر؟وفي العسكر البرهان ،مش قلنا ليكم عادي الزول ده خراب وش ممكن يرمي اشارتو يمين ويلف شمال وفجأة تلقاهو يلهط في الزلابية عند ملاك ست الشاي. بالمناسبة الزولة دي كويسة حسب حارها زميلنا صلاح باب الله يعني ما انجغمت زي ماروج البعض عشان يقولو سيادتو كراعو حارة عليها.
نعم لا للحرب وكلنا تعبنا وزيتنا طلع وشبابنا ماتو ولكن كيف ؟بالتفاوض؟على ماذا سيتم التفاوض بعد أن حدث ما حدث وكلكم تعلمون ما حدث ؟ ولماذا سنفاوض وقد انتهت المعركة العسكرية بانتصار الجيش وكسر شوكتكم ؟وعلى ماذا سنفاوض ؟ليخرجوا من بيوتنا ومشافينا التي لاذوا بها هربا من الميدان والسوخوي والميج ؟هل لأن يوسف عزت قال أن هذه البيوت والمؤسسات استلموها عبر المعركة ولن يسلموها إلا بالتفاوض؟ياتو معركة التي غنمتم فيها بيوتنا وممتلكاتنا ياعزت وانت لا علاقة لك بالعزة البتة؟وهل انتم قوة الناس تخاف منها فعلا وانتم تحتمون بالحيطان؟وهل صدقتم أن الجيش فعلا سيفاوضكم على الخروج من البيوت وهو قادر على أن يرجمكم بها ونحن عافين ليهو لكن ما عافين ليهو لو فاوضكم ،بل بس ،نحن البلابسة .
هل تظنون أن الشعب السوداني على رأسو قنبور وسيصدقكم حين تتشدقون على لسان زعمائكم البعاتي واخوهو عبرحيم أن همكم المواطن وتحريره من الفلول ويقبل بوجودكم بينه مرة أخرى وانتم من انتهكتم حرماته ،اغتصبتم حرائره واستوليتم دياره وممتلكاته ؟ميزة هذه الحرب انها حشدت للجيش الوطني حتى الذين كانوا يقولون (العسكر للثكنات) أصبحوا يصيحون (جيش واحد شعب واحد)و (جيش بس )ثم الا تعلم ياعزت أن تصريحك يفيد ما معناه (الروووب)؟وكيف سيحترمك من تفاوضه والمجتمع الميسر وانت تضع الخروج من بيوت مواطني الخرطوم مقابل التفاوض ؟هل هذه البيوت معسكرات للجيش أو سلاح من اسلحته؟انتم يا اشاوس لا تستطيعون أن تحتموا بالمدرعات ولا سلاح المهندسين ولا غيرها من الاسلحة لأنكم حا تتجغموا حا تتجغموا.وفعلا ده الحصل انجغمتو وإنتهى .
يلا مافي تفاوض حاتطلغو ولا لا؟اقعدو براحتكم نحن ما مستعجلين وانتظرو ناس (شخ)قوات العمل الخاص حاتبلكم حاتبلكم اقصد تيل عساكركم المفرر بهم وانتم تنعمون بالطيبات والترطيبات في مدن الصقيع .
الجيش ترك لكم الحبل علىالقارب وسرحت ومرحتو وما زلتم عدت اللون انتهاكتكم ومع ذلك ذهب إلى منبر جدة عشان ما تقولو كأني ماني وأثبت للعالم أنكم مليشيا متمردة مصيرها إلى زوال. ..بل بس.