وجه الحقيقة

فوكس/ هويدا حمزة / الردحي ما بفيدك يا برهان !!

كان نفسنا نصفق لويك ايها الجنرال وانت بتردح من قاعدة جبيت زي ما كل مرة بنصفق ليك لكن ماقدرنا ،مدني حالت بيننا والصفقة ،مدني يابرهان !!مدني!!مدني الانتصر فيها الجيش في ثواني وجغم الجنجويد تقوم تسقط تاني يوم ؟لا والله لم تستقط ولكنها فتحت ذراعيها لاحتضان الغزاة !!والله ما عاوزين نخونك لأنه الجيش عندنا خط أحمر وانت بتمثل الجيش ودايما بنقول عشان نطمن أنفسنا ونطمن الآخرين انه الجيش انسحب لتكتيك وخطة لكن والله ماقدرنا المرة دي نقنع أنفسنا ناهيك عن إقناع الآخرين!!سقط الاحتياطي وسقطت جبل اولياء وسقطت مدني وغيرها وغيرها فهل يعجزونكم هؤلاء الشرزمة ايها البرهان؟ولماذا وإلى متى تدخرون خططكم وقد أصبح نصف البلد في يد الجنجويد؟هل تعلم ايها البرهان أنهم في جبل اولياء انشأوا محكمة ونيابة وقسم شرطة؟هل تعلم أنهم اسسو ا عيادة لعلاج المواطنين بالمجان في العسال والمستشفى التركي؟هل تعلم أنهم يقودون المواصلات العامة الآن وكذلك السيارات الخاصة والركشات عينك ياجيش ده لو كان الجيش موجود فعلا ؟هل تعلم أنهم يتزوجون من بنات القرى في جبل اولياء ويقيمون الاحتفلات؟يشهد الله امبارح حفلتهم للصباح في السلمانية شرق والرصاص تاح تراح ولا عزاء للمرعوبين!!اخر التقليعات سمعت أن أحدهم تزوج من إحدى قروبات جبل أولياء وسد مالها 3مليار والعروس وأهلها مبسوطين ولكن ليلة الزفاف فوجئت بثلاثة دعامة قالوا لها :(انتي مرتنا نحن التلاتة كل واحد دفع فيك مليار)!!!
ثم تأتي لتردح ايها البر هان وتسب وتلعن في حميدتي كان حي كان مييت !وماذا يفيد الردحي في هذه الحالة ؟المكتولة ما بتسمع الصايحة زي مابقولو ونحن خلاص بقينا نتمنى الموت فتنا الحرب قي الخرطوم لحقتنا في مدني ،تصدق يابرهان بيتنا في ريف جبل اولياء الدعامة عملوهو ارتكاز بعدما طردونا وجميع أهل القرية ولكنهم غادروا الآن تصدق حتى حبوب منع الحمل والأرواب الرموش الصناعية لقيناها البيت؟تصدق انه لقيناهم مهرهرين في الهول بتاع اخوي إن شاء الله آخر هرار ليهم !!بيتنا معفن ياجنرال
ماقادرين نقعد فيهو لا كهرباء لا موية !!وما بيتنا إلا مجرد نموذج من بيوت الحلة ،اما السرقات فحدث ولا حرج؟ياخوي الرهيفة التنقد والتمطر حصو على قول البعاتي ،نحن بقينا ماقادرين نثق في الجيش،ياتو جيش؟نحن ما شايفنو!!!بقينا بناكل من سوق دقلو عاادي لأنه مافي اكل غير و .
ياخي انا بتمنى انه مخاوفنا دي تطلع مافي محلها.عاوزين جيشنا البنعرفو يجي يحسم القصة دي وسيبك من الاراجوز الهارب.
وقصة الدين دي خليها على جنبة المرحوم ذاتو قال انت ما بتصلي!!

اصحى ياجيش واحسم لينا الحرب دي ولو دعا الأمر احسم لينا البرهان نفسو.