وجه الحقيقة

*يوميات نازحة(6) هويدا حمزة*

(لستك الروزا بنشر ياجماعة اتصرفوا اركبو اي حاجة توصلكم الميناء ) هكذا تحدث إلينا السائق والكمساري !
نركب شنو ونحن قروشنا محسوبة وخايفين من القطعة ؟ننتظرك يا زول).
لا لا ما تنتظروني لأنه ما معروف نصلحو متين،ارفعو عفشكم في كارو واركبو انتو المواصلات ).طيب
*يا كارو نحن نازحين بتودينا الميناء بكم؟
-ادفعو اي حاجة ..الساهلة بس
*ياسلام عليك ياولدي ربنا يكرمك في الدارين.
المهم السواق قال ادوهو الف جنيه نحن اديناهو 2000.رفعنا عفشنا ومعه اختي وانطلق الكارو نحو الميناء وركبنا نحن هايس قال لي أحد الركاب أن التعريفة 500 جنيه ولكن السائق أصر على 1000حتى السوق فقط ولو عاوزين تمشو الميناء ده مشوار جديد الراكب بالف مع العلم اننا ما ركبنا من المحطة وأننا شرحنا ليهو ظروفنا لكن وقف الف أحمر..ياخي انزلو وانت أخجل وامشي احلق شنبك ده لأنه الرجولة ماشنب 😪
دي انا طبعا بنبز في السواق وهو كمان ماقصر في النبز، مشينا كملنا المشوار بركشتين.
وجدنا دفار قيل لنا أنه ذاهب إلى ابقوتة وحدد 10 الف للراكب رغم أن التعرفة ب7 ألف فاحتج الركاب وقال إذا تميتو 30راكب بشيلكم ب10.عددنا وصل اكتر من 50 ومع ذلك رفع سعر الراكب إلى 15ألف وكمان قال نبيت ونتحرك الصباح رغم اننا انتظرناهو اكتر من ساعتين،(الاستغلال في ابشع صوره ).نادينا ليهو 3 جياشة في السوق طلبوا منه التحرك ب7الف وعندما رفض اخذوا رخصته وشهادة البحث وطلبوا منه أن يلحق بهم لا أدري إلى أين فذهب ولكنه عاد بعد قليل وركب دفارو وكأنه يمد لسانو لينا ماعارفة عملو ليهو شنو ولا عمل ليهم شنو 🤔ياخوانا الحرب دي سببها نفوسنا الشرهة دي.
المهم مشينا الجامع واستأذنا في المبيت فأذنوا لنا جزاهم الله خير ودعمنا أحدهم بفرشة إضافية من منزله وقال لي :(لو الحمامات قفلوها تعالو خشو في حمامات بيتنا)كتر خيرو ماقصر.رقدنا في الفرشات البلاستيكية على الارض الصلبة وكان الطقس باردا فلم يعرف النوم طريقه إلى جفوننا فكان الليل طويل طولا يجنن.
اسفر الصبح فانتقلنا إلى الموقف ووجدنا الدفار المتجه إلى ابقوتة والركاب يحملون امتعتهم إليه ثم صعدنا اخيرا انطلق الدفار ويبدو أن السائق ليس خبيرا بالطريق لأنه (وحل)بنا في المشروع ثلاث مرات وبصعوبة استطاع الركاب انتزاع الدفار من الطين .
وصلنا ابقوتة وقد سبقنا خبر دخول الدعامة مرة أخرى إلى سوقها (اجي..شكيتهم لي الله محل قبلنا نلقاكم معانا معانا زي ضلنا).لكن رحمة الله بنا جعلت موقف مواصلات (الربع بكسر الراء والباء)خارج السوق .ونحن نقوم بإنزال حمولتنا من الدفار جاء آخر يقصد الربع فركبنا حتى أنه ذكرني بسفينة نوح وعند وصولنا طلبنا منه أن يوصلنا إلى قرية السواجير التي نزحت إليها شقيقتي فوزية وأولادها بعد عيد الأضحى بعيد سقوط الإحتياطي المركزي جبل اولياء بقليل .اوصلنا صاحب الدفار ربنا يجزيه خيرا وهناك وجدنا القرية الطيبة تقف على قدم وساق بانتظار وصولنا خوفا من أن يكون أصابنا مكروه ذلك أن شقيقتي ونحن في المناقل أخبرت زوجها اننا ركبنا دفار ابقوتة وسنصل خلال اليوم ولكن شاءت إرادة الله أن نبيت وهواتفنا افرغت شحنتها من الكهرباء ولم تكن هناك وسيلة تواصل لنخبرهم ان سفرنا تأجل فجن جنونهم خاصة حسن إبن خالتي و زوج شقيقتي وابو أولادها والجماعة قالو لينا حسن ده بكى بدمعتو ولو انه دمعة الضأن بالقراصة أحسن من دمعة حسن )خاصة لزول جعان😋.
انا ماعارفةالزول السماها (السواجير)منو؟ياخي ظلم القرية وأهلها الطيبين. الساجور معناها العارض في عاميتنا السودانية ناس زي ديل يستحيل يكونو عوارض ماعاوزة اذكر اسماء عشان ما انسى خاصة اني ماعشت معاهم ومابعرفهم كلهم ولكن اكتفي بكبيرتهم خالتنا فاطمة بت السراج وإبن شقيقها التاجر حاج علي كرمز لبقية أهل القرية الطيبة الذين احتووا النازحين إليهم واسكنوهم في بيوت منفصلة وتكفلوا بمعيشتهم حتى رحيلهم.
بل قالوا لهم عند الرحيل(لم تصلو بيوتكم لو احتجتو لأي حاجة اتصلو).
بعد أن بقينا معهم يومان ودعونا والدموع في عيونهم خاصة النساء ولم يقصروا في دعمنا بالذرة والقمح والفول وغيرها من خيرات القرية وانطلقنا وكلنا شوق إلى الديار التي طال هجرها بعد أن احتلها الدعامة حطب القيامة وقد عزمنا على عدم مغادرتها مرة أخرى مهما حدث وموت لي موت اخير في بيوتنا.
نواصل