وجه الحقيقة

لمة ما منظور مثيلها في إفطار. وزير اعلام إقليم دارفور الاستاذ عبد العزيز سليمان.

كتبت :هويدا حمزة

الذين يتحدثون عن العنصرية والتمييز العرقي اقول لهم كما قالوا (يا عنصري ومغرور كل البلد دارفور )والمغالطني يجي يشوف القبائل والسحنات التي اجتمعت أمس في نادي الموانئ الجميل تلبية لدعوة إفطار وزير إعلام سلطة إقليم دارفور الاستاذ عبد العزيز سليمان ورجل الأعمال خالد شمو…صراحة قمة التصالح والاحترام والبهجة خاصة عندما بعد الأفطار الشهي .بدأ الفنان حسين حكمة في التغني بانغام عميد الفن الراحل أحمد المصطفى(غايتو حسين ده نحن السيدات طالبنو حفلة خاصة ما معانا اي مفتش عشان نفك اللجام ونطلع هدى عربي الجوانا.مافي زول يقول لي حالتكم نازحين الحاجة دي اسمها هيستريا الحرب والله جد الدكتور النفسانية قالت كدة لم عملنا حفلة جبجبنا فيها ما خلينا شئ.
مفتش القطر كان زوجي العزيز عصام الخير إلا أننا اخيرا حرضناه على فك اللجام وكان عصام عطر الجلسة حسب الزميل عبد الباقي العوض والزميلات العزيزات.

اللمة المعمولة بحب للصحفيين ضمت
الاستاذ حمد هارون المدير التنفيذي ومدير إدارة الأبحاث الجيولوجية بالسودان
الرجل الثاني بوزارة المعادن. تحمد قال
(السودان ده ماعرفنا جميل وممكن يستوعبنا جميعآ الا بعد الحرب ساحة مهمة ماكنا بنعرف بعض انتو الجنود الحقيقين بعد القوات المسلحة لازم توعو الشعب السوداني انه الحرب مافيها حسنات والشعب السوداني متجانس اتمنى الحرب تكون درس ونصحح المسار
إضافة للزملاء هيثم الريح (هيثم فك اللجام مع حسين حكمة اكتشفنا فنان جديد جواه
من القوات المسلحة كان حضورا الرائد احمد البلال الذي ترحم على ارواح ربنا يتقبل الشهداء وينصر ودعا بالنصر للقوات المسلحة اصلو الجياشة ديل ماعندهم كلام كتير ناس بل بس.
زميلنا الاستاذ بكري المدني تحدث نيابة عن الصحفيين وقد امرناه بحكم السن 😀حيث أن عاصم البلال صاحب هذا المنصب حصريا لم يكن موجودا وكان ضيفا في إفطار آخر .
أما الزميل ود البورت عبد القادر باكاش فقد رحب بنا في المدينة الجميلة كاصحاب دار ولكن رأينا منه الاستغلال في ابشع صوره وهو وهو يتمنى أن تصبح بورتسودان العاصمة البديلة😃 عاصمة دائمة ونحن نقول لباكاش بنتمنى ليكم الخير لكن والينا ووزير صحتنا شغالين وقدامهم الفارس الجحجاع سيادتو ياسر العطا وبكرة يالخرطوم تعودي❤️
ما حدثتكم عن الدموع السالت مننا وحكمة يغني (انا دستوري نازل في الخرطوم تلاتة) دموع مطر بدون براق خاصة مني والجميلةسارة الطيب.


عطر الجلسة بكلمته بكلماته الزميل عبد الباقي العوض اما نحن الجندر فقد مثلتنا على المنصة الزميلة مزدلفة دكام.
وزير الإعلام الشاب عبد العزيز سليمان اشاد بالمبادرة الكريمة رجل البر والإحسان رجل الأعمال الاستاذ خالد شمو في إطار المشاركة في العمل الإنساني وتخفيف آثار الحرب في الشهر الكريم وقال انهم رحبوا بالفكرة وهذا الإفطار الثالث والمبادرة اسمها (نحن فاطرين معاك)ونحن نزور الجميع في مواقعهم ابتداء بدار الأدباء والفنانين وقبل يومين كنا مع أساتذة الجامعات واليوم مع شريحة مهمة هي شريحة ودعا سليمان لتكثيف العمل الاجتماعي في ظل الظروف الراهنة.
شكرا الشباب في التنسيق لا استحضر أسمائهم جميعآ وشكرا جزيلا لشباب الضيافة وشكرا جميلا عبد العزيز وخالد.