فوكس / هويدا حمزة / معليش ياعيد ماعندنا عيد😭

في مثل هذا الوقت من كل عام نحن مشلهتين لكن فرحانين..(يااااارب العيد مايثبتوهو بكرة يادوب انتهينا من الخبيز وكسينا الشفع وكسينا روحنا وفي الغالب الاعم تكتفي الأمهات بجلباب بيت وسفنجة ولو بالغت توب هزاز(الإيثار في أعظم صوره )واصلا الأم هي رمز التضحيات ) ولسة الحنة والنضافة وأيييك ..😪والرجال زهجانين مننا يتقلبو من جنبة لجنبة من كترة الرقاد لمن جنباتهم وجعتهم وبعد ده كلو يكوركو يا مرا ماتكركبي خلينا نكمل نومتنا تسعة وعشرين يوم ماكفتكن عشان تكمل شغلتكن تفتشن ليها في اليوم الواحد ده؟يارب بكرة العيد عشان نشرب لينا موية بااردة.🤣اها وانت يا ابجيقة تسعة وعشرين يوم ماكملت نومتك جاي تكملا الليلة؟قوم اتفكفك خلينا ننجز😡
وغيرها من الذكريات الجميلة ونحن نستقبل العيد بالحب والتصافي والتعاون ونمشي الجامع شايلين مصالينا ونحن في حالة هرولة كل عيد لندرك الصلاة عشان الإمام ده شفقان وبصلي بدري ونصلي والإمام يدعي لينا بالمغفرة والرحمة والرزق والعرس ولا ايما الا زوجته والبايركس يقولو آميين 🤣
آآآخ أيام ..تكاد العبرة تسد حلقي لا عيد لا حلاوة لا خبيز لا ملايات جديدة لا نضافة ،وهي ذااتا وينا البيوت البنضفوها ما الجنجويد نضفوها خلاس وبالاحرى شفشفوها ونجسوها ونحن اصحابها نصيبنا مكتب أو فصل مشترك في مدرسة في ولاية نائية نقتسمه مع آخرين في غربة داخلية ما اقساها،وانا اكتب هذه السطور بنشط الشباب في نصب خيم بالمدرسة التي اقطنها استعداد لاستقبال نازحين من الخرطوم ومدني يجري نقلهم إليها بعد لإخلاء المدارس التي يقطنونها بعد قرار الوالي فتح المدارس لإجراء امتحان الشهادة السودانية(لا تعليم في وضع أليم يا سيادة الولاة المحنرمين )😭
كل مرة ازداد إعجابا بوالي الجزيرة السابق الاستاذ إسماعيل عوض الله العاقب الذي رفض قرار مجلس الوزراء بفتح المدارس وقال (عندي خمسة مليون نازح اوديهم وين؟اعمل ليهم خيم؟ما بعملا وانا من الاول ماعملتها ولم جا الإعلام الخارجي يفتش المخيمات مالقاها ،علي الطلاق يا ناس الخرطوم انتو جيتو بي خيركم)❤️
أكرمك الله يا إسماعيل وأكرم والديك،راجل من ضهر راجل.
يعني ناس الخرطوم وناس الجزيرة ماقرو انتو القراية ليكم شنو يا ناس الولايات.؟ خلاااص يعني مقطعنها أوي😏
هل تعلمون ايها الولاة أن بولايات الحرب طلابا لم يغادروها ولا يستطيعون الذهاب لأي ولاية للامتحان نسبة للظروف الأمنية و للمشقة الجسدية والمادية فهل ستتركونهم نسيا منسيا؟ومن هنا نطالب بفدرالية الشهادة السودانية يلا كل ولاية تمتحن بي راحتا طالما ليس هنالك تقدير للظروف وطالما انكم نسيتم أن هنالك ممتحنات تم اغتصابهن من قبل الجنجويد وطالما لا تدركون أن الوقت للمعركة 😏
سيمر هذا العيد كما مر رمضان وسنبتلع غصتنا ونحن ندعو الله مع الإمام أن يدحر المليشيا المتمردة وينتقم من الخونة والمرتزقة والعملاء وإن يعود السودان نظيفا آمنا مطمئنا كما تدعو الله أن يصبرنا على البلاء ويجعله في ميزان حسناتنا(كُتِبَ عَلَيْكُمُ ٱلْقِتَالُ وَهُوَ كُرْهٌ لَّكُمْ ۖ وَعَسَىٰٓ أَن تَكْرَهُواْ شَيْـًٔا وَهُوَ خَيْرٌ لَّكُمْ ۖ وَعَسَىٰٓ أَن تُحِبُّواْ شَيْـًٔا وَهُوَ شَرٌّ لَّكُمْ ۗ وَٱللَّهُ يَعْلَمُ وَأَنتُمْ لَا تَعْلَمُونَ)صدق الله العظيم.