" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

*(مشاوير الخرافة)!.*
▪️(يا صباحات الموانئ…
حتى لو دربك ترنح فى مشاوير الأغاني…
والجرح ارتد بينا لي زمان الآهة تاني)….
▪️بالله شوفوا (ابوذر الغفاري) في (دربك ترنح) دي؟!..
(سف وقارن)!.
▪️(يانا لا بنتحاشى صدك…
لا بتموت فينا الأغاني)!.
▪️يعاني الساسة في السودان من متلازمة (اولاد الضرات)!.
▪️البرهان يستعيد حظوظه مجددا!..
▪️(قديمة) رجعت لي (حليمة)!!..
و(علي الطلاق) حليمة في القاهرة ما عارف (الواو) من (الواو الضكر)!..
▪️الغريبة انا ذاتي ما عارف؟!..
▪️عند سقوط (الابيض) في يد الدراويش (خمش) موسى ود الأسيد قبطية (زي الدم)..
لحقها بفرسه ورفعها قدامه.. وأعاد توجيه الحصان الى جهة الصعيد..
صرخ فيه احدهم : يا زول انت ماشي يين؟..
فرد موسى :
(ماشي اهلي، وقولوا للمهدي ود الأسيد حوريتو لقاها)!..
▪️الجاكومي:
(ولا يهمك.. واثقين منك)!..
▪️عم السنهوري في القاهرة..
(عمى الدبب)!..
▪️في اي تشكيل وزاري قادم يستحق حزب البعث وبلا منازع حقيبة (الاكروبات)!..
▪️في القاهرة -وفي كل المؤتمرات- هناك باب يقال له:(الباب البجيب الريح)؟!..
▪️عندما رفض المريخ اللعب أمام الهلال بحجة دخول الكاميرات سخر أحدهم بالقول:
(دي “كورة” ولا “رقيص عروس”)
▪️ما ينوم!..
▪️وزير الخارجية في روسيا..
(افراحنا وقلوبنا معاك)!..
▪️مصر ما دعت:
(الجاكومي،عرمان،فيصل،مريم،تمبور،سلك،الفكي و…)..
(شرَّك مقسَّم فوق الدقشَّم)!..
▪️في بورتسودان في حتة اسمها (غضب الوالدين)!..
▪️يا (أردول):
(أتذكر إذ لحافك جنب”عسكوري” و”المروحة” نمرة 3)!..
▪️(مناوي) في القاهرة..
(شوية مع دول)!..
▪️راقبوا معي القائد (الجنا) أو (الجنا القائد) بتاع “الدندر”..
وكذلك اللواء (دياب) بتاع “القنقر”..
ديل (مُرّين ياخ)!..
▪️وفد (الصحافة الوطني)..
سيعود من بورتسودان (بلا رقبة)!..
▪️أنا خائف من (ناجي) اكتر من (الجنجا)!..
▪️بيجيبها (حامضة)!..
▪️قال لي: (“البرهان” رفض عرضا من قطر بقيمة 10 مليار دولار مقابل تسليمهم “البشير”)!..
(جبصت) ليهو وغنيت ليهو طوالي:
(يا عايش في دنيا..
من أوهام خيالك)!..
▪️(فريج مرر)!..
(حسيت بي شنو)؟!..
▪️هل ستنجح (الفنادق) في إخراج الناس من(الخنادق)؟!..
▪️ادينا (فندكم) ندق ونديكم!..
▪️(جرب وانت سيبنا)!..
الخيار لديك!..
▪️يثق الناس في البرهان..
▪️(لوكي القرضة وامسكي في)!..
▪️في مؤتمر (كمبالا) النسوي، (عائشة) بت ناس (مناوي) عضت (مريم) بت ناس (حمدوك)..
(عضتها ودقتها)!..
*أشرف خليل*
