وجه الحقيقة

فوكس/ هويدا حمزة تكتب/ شعب زبالة

صراحة” الخريف دائما بفاجئنا نحن والحكومة على حد سواء! على المستوى الشخصي كشعب سوداني بكون نصنا فوق راس البيوت عشان ننضف السباليق (الكلام ده بعد أول مطرة طبعا وليس قبلها) والنص الاخر بكون رابط جلابيتو ولا عراقيهو في نصو وشايل كَوريقو ولا طوريتو بفتح في المجاري بتاعة بيتو لأنها مقفولة بالتراب وصفق الشجر وبالتالي الحوش مسك الموية ودخلت الغرف والعدة طفحت وكذلك السفنجات واحتمال كتب وكراسات الشفع ولو في طفل حديث الولادة احتمال برضو يطفح، وكل الحاجات الخفيفة ولفيفة بتطفح لتأتي بعد ذلك مرحلة (غرف الموية بالجرادل والطشاتا ومرات كثيرة البيوت ذاااتا بتطفح لأنها قاعدة في مجاري السيول والسيل زي مابقولو ما بخلي مجراه الكلام ده في المناطق الريفية طبعا.
بالنسبة للحكومة اذكر انني اتصلت على معتمد صديق لنا في بداية ذات خريف لأساله عن استعداداتهم للخريف خاصة أن محليته تغرق في شبر موية ناهيك عن سيول وفيضانات إضافة لعدم تخطيط القري وانا احكي هذه الحكاية كثيرا، وما أن سألته حتى قال لي بالحرف الواحد (اها الخريف جا عشان تلقو ليكم موضوع)! يعني نحن ما عندنا موضوع يا سيادتك والبلد كلها مواضيع؟ من لدن الإنقاذ وحتى يومنا هذا! ولعلمك نحن كصحفيين بناكل عيش من المواضيع دي ومع ذلك ربنا يصلح حال البلاد والعباد.
قيل أن أحد المسؤولين في العهد السابق عندما سئل عن استعدادات الخريف قال (الخريف فاجأنا!) لا أدري إن كان ذلك صحيحا ولا دي شتلة صحفيين ساي.وحتي لا نفاجئه فاجأنا بهذه المقولة المدير العام لهيئة الطرق والجسور رئيس آلية الحد من مخاطر وأضرار الأمطار والسيول والفيضانات بولاية الخرطوم المهندس مختار عمر صابر والمهندس التجاني يعقوب مدير المشروعات في المؤتمر الصحفي الذي عقد بمقر الهيئة يوم الخميس المنصرم وانا لا اريد ان اعيد ماقيل فقد حامت الاسافير بخبر شح الإمكانيات مع علو تكلفة صناعة الطرق والجسور في بلد مثل السودان ينضح بالأزمات أزمة انتاج وازمة علاج وازمة ضمير والاخيرة هذه أكثرها خطورة.
هل صدقتم اننا فعلا شعب عظيم؟ لا بالله نحن شعب زبالة وانا هنا أطلقت الكل واردت البعض عشان ما يجي واحد يقول لي زبالة انتي، شخصيا لا ارمي منديل ورق على الطريق ناهيك عن رمي القمامة في مصرف مياه الامطار وقد شاهدت بأم عيني هذه القمامة في المصارف تسد طريق المياه وفي خريف العام الماضي بعد أن انتهت عربة الحكومة من تطهير المصرف الذي يفصل بين الفيحاء والإسكان شاهدت احد الصبية يشيل ويردم في المجرى بالتراب وعندما سألته ليه بتعمل كدة ياولد والعربية يادوب مشت قال لي بكل برود (عشان ادخل الركشة)! زبالة ولا مازبالة؟ صحيح الحكومة مسؤولة عن توفير براميل القمامة ونقلها قبل أن تمتلئ وتتدفق لكن حتى المناطق التي بها براميل
تجد محتوياتها قد تناثرت على الأرض لأنو في شفع بنكشو البراميل دي بفتشو على الكريستالات! زبالة ولا ما زبالة؟
مدير الطرق والجسور المهندس مختار قال (ماشفت لي ناس بسرقو غطاء المنوهولات الا في السودان! المنهول على ذمة المدير بكلف 100 الف والزول البسرقو بختو في الميزان وببيعو بألفين! زبالة ولا مازبالة؟ المسكين ماعارف قيمتَو، ياخ اغطية المنوهولات دي حقو نحن نشكرها جزيل الشكر ونحافظ عليها لأنها بتستر زبالتَنا الجانب الذي لا نحب ان يطلع عليه الناس منا، بنطلع نضيفين وقاشرين ولو نطقت المنوهولات واغطيتها لفضحتنا وهي تفعل ذلك احيانا عندما تنفجر وتكشف المستور. ياخ حقو لو لقيت غطاء مكسور تمشي تشتري واحد وتجي تختو محل المكسور. ولا ماكدي؟
على مستوي القطاعات الإنتاجية هنالك زبالة بينها أيضا فقد علمنا ان هناك مصنعا ببحري قطع شارع الاسفلت الذي يكلف المليارات اكثر مما يكسبه بسبب قطع هذا الشارع، المدير تحفظ على اسم المصنع كنا نتمنى أن يفصح عنه فنفضحه في العالمين! زبالة ولا مازبالة؟ مع العلم ان كثير من المؤسسات تقطع الاسفلت عادي كما تقطع قطعة الخيار
زيد وعيك يا مواطن،لا ترمي القمامة في المجاري، نظف الشارع كما تنظف بيتك واضعف الإيمان ان تضع قمامة منزلك في المكان الذي تصله سيارة النفايات والحكومة ما حا تعمل ليك اي حاجة فهذه ليست الجنة.
لا تبني في مجاري السيول والفيضانات لأنه السيل بشيلك و(ستصرخ). وعلى الحكومة عمل معالجات لمن يسكنون هناك وتعويضهم في َمناطق افضل. احرصوا على نقل الأنقاض لأنها تسد المجاري. نشط حبة المسؤولية الجواك عشان نبنيهو بالجد ما حنك بيش.
اعتذاري للبعض الذين لا يشملهم حديثي فليس كلهم زبالة. اقول ذلك وأعلم ان من ينطبق عليهم وصفي لا يقرأون ولكن تقع علينا مسؤولية أماطة الاذى عن الطريق ولو باضعف الإيمان.
تحياتي