" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

*فوكس* *هويدا حمزة* *شارع الحرية.. الجلابة عملوها*
بالأمس احتفلنا معهم قرب جامع فاروق بعودتهم وعودة الحياة لشارع الحربة وما ادراك ما شارع الحرية الذي يؤدي ل (السجانة).. شارع الحرية هو قلب الخرطوم النابض كما وصفه والي الخرطوم الأستاذ أحمد عثمان حمزة ومدير شرطة الولاية الفريق شرطة أمير عبد المنعم والمدير التنفيذي لمحلية الخرطوم الذي شرفوا الاحتفال لأهمية الحدث وعندما تعود الحياة لذاك الشارع فهذا يعني ان الحياة عادت للخرطوم. عرفت الخرطوم دي حقت ابو منو يا عبدالرحيم كما كتب أحدهم..؟ الخرطوم هيلنا ونحن أهلها ورجعنا ليها رغم انفك ورغم أنف الكدايس. انا مش قلت ليكم اي زول ينضف خشم بيتو ومصنعو و مؤسستو باحساس وطني عال الخرطوم بتنضف؟ هاهم تجار شارع الحرية قد فعلوها ويوم الجمعة بإذن الله تجار الدهب حايفتحو العمارة.. اها شنو ليكم
لكوني قادمة لمحل الاحتفال من جبل اولياء رغم انني اعاني من وعكة صحية الا ان أهمية الحدث فرضت على الذهاب لكونه فرصة للتشبع بالطاقة الإيجابية وتنسم عبير (الحرية) بعد أن عاث الدقلاب في الخرطوم وفي السودان كله كسر الله عضمهم اقول وصلت متأخرة ووجدت دماء الذبائح على الأرض. ياجماعة ان شفت الدم بس لكن الضبيحة يعميني لا شفتها لا ضقتها!! طالبنكم ضبيحة يا الحارث ومعاذ وصحبهما.. الحارث ده رئيس لجنة مبادرة تجار سوق الحرية للعودة ومعاذ عضو اللجنة.
رغم خسائرهم المليار ية الا ان لسان حالهم يردد مع المغنية التي كانت تصدح صوت بس ياجماعة ماعارفة هل كانت انصاف مدني ولا إيلاف عبد العزيز ما مثقفة انا في الفنانات ولا القونات زي ما تحبو لكن الاتنين غنو (بنعود) والاتنين صوتهم تخين.
ماعلينا المهم ان تجار الحرية تجاوزوا خسائرهم ومراراتهم وعادوا ليمارسوا مهمتهم والبداية من الصفر رغم انه الصفر نفسه صعب عليهم ولكنهم ادركوا انهم لابد أن يكونوا هم من يدقون طبول السلام والعودة للخرطوم حتى لا يسكتهاَ الكدايس كما تمنت لها قيادة المليشيا (شلل أطفال إن شاء الله) وشملت المبادرة ارالة الانقاض من الشارع وترميم المحلات ونظافته وانارته.. اتخيل معاي كده الانوار تسوي كدي👋في شارع الحرية مافي اجمل من كدة والله العظيم وعقبال كل الخرطوم.
ناس الشرطة ووزارة الداخلية سبقوا الجميع فعادوا ونظفوا مقارهم رغم انقطاع الكهرباء والمياه والحمد لله ناس الموية كتر خيرهم شغلوا محطة الجريف وبري و المقرن خلال يومين كما وعد الوالي.
كذلك ناس وزارة الصحة عادوا وهم في إطار ترتيب أوضاعهم للعودة الكاملة وبعد شوية بورتسودان المضيافة تفتش للنارحين حكومة وشعبا ما تلقاهم.
تجار سوق الحرية حوالي 300دكان تزيد أو تنقص قليلا لا أذكر الرقم بالضبط ولكن سجل للعودة منهم 90دكان ومن عادوا وفتحوا محلاتهم فعليا 34 فبقية ال90مازلوا يقومون باعمل الصيانة وبقية ال300مغتربون اصروا على اللجنة ان ننتظرهم يفتحوا معهم ولكن اللجنة مستعجلة لإعادة الحياة للحرية ولكن ما فات شيء تم جدولة من تبقى يفتحوا بتواريخ محددة. ومعاهم ناس ديجيتيك تعهدوا بتوفير كل المعينات رغم خسائر هم إلا أنها ما اكبر من خسارة البلد كما قال الشاب إيهاب.
شرطة الولاية تعهدت بتأمين المحلات التجارية من الحرامية والشفشافه لانه هنالك بعضهم يرتدي زي الجيش ليشفشف باسمه.
موفقين ياجلابة وربنا يعوضكم خير ويطرح البركة في ارزاقكم فقد جسدتم الوطنية في أبهى صورها.
