وجه الحقيقة

*فوكس* هويدا حمزة* *تعامل الشرطة الفوضوي مع السيارات المنهوبة*

اتصل علينا أحدهم ليخبرنا انه عثر على سيارتنا التوسان المفقودة منذ حرب مدني إذ تركناها هناك وولينا هاربين نجرجر بعض اعزاضنا وقد القينا بأكثر من نصف الاشياء على قارعة الطريق لصعوبة حملها مع والدينا وأطفالنا. أخبرنا الشاب ويبدو انه كذلك من نبرات صوته انه يطلب 150 الفا نصفها نصفها قبل والآخر بعد ورغم انه ارسل إلينا صور ا للسيارة ورقم الشاسي ياهو زات بشحمو ولحمو رغم ان السارق الصق عليها استيكر (حسبي الله ونعم الوكيل)!! ماعارفة بتحسبن على منو؟!! رغم ذلك قلت له (ما حا ادفع جنيه قبل الاستلام ولكني ملتزمة بالدفع بعد الاستلام) قال لي بكل قوة عين والله في ناس كتيرين زاغوا بعد استلموا فقلت له (الناس كلهم ما واحد والله وتالله بعد استلم اديك) ماعارفة حليفتي دي اوديها وين هسة.
المهم قال لي مادام التزمتي حا اصدقك وارسل لي رقم هاتف ورابط وقال لي انا وسيط اتواصلي مع الرقم ده واخبرني انه من شندي واسمه عمر وكان يعمل في الكهرباء وقال إن السيارة موجودة بالخرطوم ولكنه لم يفصح عن مكانها لانه هو نفسه لم يكن يعلم..
اتصلت على الرقم المعنى وسالته عن السيارة فقال انها موجودة بالكلاكلة دون تحديد فسالته عن الشاب الذي اتصل بي قبل قليل فقال لي بالحرف الواحد( ما بعرفو ولا عندي بيهو علاقة.. الزول ده دخل صفحتي لقاني رافع صور التوسان وبياناتها وقال لي دي عربية لولاد خالتي انا يوصلهم بيك!!) اتخيلو نحن اولاد خالتو،، احتمال جدي كان معرس في السر.
المهم قال لي انتي خاتة ليها بشارة كم فقلت له اتفاهم مع اخوي ووصلتهم ببعض وعندما وصل اخي لمكان اللقاء في الكلاكلة اللفة-طبعا ده ما مكان العربية) طلب الرجل من اخي مبلغ مليون يعني مليييار عديل كدة عشان يوصلنا لعربيتنا.. اخي قال له 100الف فقط ما يزيدك جنيه. فقال له (شوفو ليكم زول غيري يوصلكم. وغادر.. اتصلت انا عليهو وادردقت في الواطة وهاك يا تحانيس عليك الله وصف لي ب200الف حا اجازفهم ليك وانا عندي أسرة كبيرة وبربي في يتامى.. الخ. فاشفق على وقال انا بطلع الركشة ب200الف.. عشان ظروفك بطلعا ليك ب300 الف.. شفتو؟ نفسسي حركات الدعامة وفعلا استلفت 300الف وحولتها ليهو ومشي اخوي لقى العربية نصها مشفشف ونصها موجود والحمد لله على سلامة المكنة.. يعني الزول ده كان ماشي بالشارع قام شاف العربية واصلا بياناتها وبيانات الشاكي في تطبيق مفقود فقام صورها ورفع الصور وكسب من وراها 300والقبلو دخل صفحتو برضو شاف العربية المرفوعة وقال يسترزق برضو؟!! وكل واحد ينصب على صاحب السيارة المسكين.
هل تعلمون لماذا انتشرت ظاهرة الاحتيال هذه؟ لأن الشرطة قصرت او تقاعست عن التواصل مع المنكوبيم و تسليمهم سياراتهم. لا يكفي ان يخرج الناطق الرسمي باسم قوات الشرطة بتصريح يذكر فيه عدد العربات التي تم جمعها وهي كلها خرد تقريبا الا ان بعضها مازالت ماكينته موجودة.
ماذ ا نفعل كمواطنين منهوببن بعدد البلاغات وعدد العربات التي تم جمعها ان كنا لا نستطيع الوصول إليها؟
بينات كل سيارة وبيانات مالكها ورقم هاتفه موحودة في سجلات المرور فلماذا لايتم الاتصال مباشرة به وابلاغه ان سيارته كان نصيحة كان خردة في المكان الفلاني الذي وضعتها فيه الشرطة بعد سخبها وتعال استلم معاك مستنداتك ومستندات السيارة خاصة ان الشرطة لديها منصة بلاغ إلكتروني وكذلك الجيش وكذلك النيابة ويوصلها ليهو بسحاب المرور محل عاوز يوديها؟ فرغوا عدد من أفراد المرور المرصرصين في الشوارع يترصدون المخالفات لهذه المهمة.
الأمر الآخر طالما ان صاحب السيارة يحمل شهادة بحث ونشرة جنائية وإثبات شخصية.. ما دخل الإستخبارات حتى يتم اقحامها في اذن سحب العربة بسحاب حسبما يشترط أصحاب السحابات حتي لا تحرر في مواجهتهم مخالفات او يمنعون من عبور الكباري؟ الاستخبارات وراءها اعمال عظيمة تتعلق بأمن البلد فلا تشغلوها بالخرد ولا ترهقوا المواطن أكثر مما هو مرهق.
للمعلومية أجرة السحاب قد تصل لمليون حسب المسافة وبعد ذلك ناتي الحفرة الكبيرة المسماة صيانة السيارة. يعني ياناس المرور مفروض زي مابتسحبو العربية الواقفة غلط خليكم منصفين واسحبوا للمواطنين شقي أعمارهم الذي تحول لخرد. النصيحة حاااارة لكن لا خير فينا ان لم نقلها وبا خير فيكم ان لم تسمعوها يا شرطة في خدمة الشعب.!!
بالمناسبة.. دي بقت مهنة.. اقصد وصف السيارات بمبالغ مهولة وهنالك عدد كبير في الازقة والحواري للم تصلها سحابات الشرطة.. يعني خارج الرصد.