" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

*فوكس**هويدا حمزة* *يا ايام فرقتينا😭
سفر الغربة بهدلنا
اوو ب الليلة يا هل
يا ايام فرقتينا
من أحبابنا شلتينا
وبعد الفرقة لمينا
اووب الليلة يا اهلنا
غنتها امي عليها رحمة الله بعد العودة من النزوح ووثقتها بنات اختي بالصوت واستمعنا إليها في عزاء امي الحبيبة فاشعلت النيران فينا وغلبنا الصبر خاصة وقد ختمتها وهي تضحك بعبارة (اها رجعنا أهلنا واتلمينا) لتنفجر المآقي بالدموع الماراضية تقيف.. ٠
باي دمع ابكيك يا أمي؟ لو ذرفت دمى دموعا ما ببرد حشاي… ياجماعة امي دي انتو ما بتعرفوها، هي ما امي وبس.. لا دي اختي وصاحبتي وحبيبتي .. امي دلعتني شدييد منذ صغري وحتى لحظة مماتها.. لم اجي من الجامعة بلقي امي طلعت لي سريري في الحوش وفرشتو وبتعمل كل حاجاتي وحتى بعد اشتغلت مازال الدلع مستمر لدرجة انو اخواتي بغيرو وبقولو ليها بتفرزي هويدا مننا. بتقول ليهم هويدا ما بتقدر فيقولو ليها نحن زاتنا ما بنقدر. من باب المداعبة طبعا. يا اخواتي انا بتها الكبيرة(معمولة بحب).. رغم انه اخواتي زااتهم دلعوني وما بخلوني ارفع كباية الله يديهم العافية طلعوني (خملة).
امي ما قطعت قلبنا نحن بناتها بس بل كل الاهل والجيران وكل من يعرفها.. خالتنا حنان قالت لبناتها والله بناتها ديل بشوفهن زي الخلتن برضعن) صحي والله انا واخواتي الان عندنا احساس اننا أطفال بنرضع وامنا ماتت ولم نجد مرضع.
امي دي ما بتعرفوها.. مازي بقية الأمهات، طبعا ده احساس اي زول بشوف امو افضل واجمل من كل الأمهات.. امي زولة جميلة وناسة جلااسة.. صلاية.. صوامة قوامة طبعا في جبل اولياء بنوم في الحوش، بعد صلاة الفجر التي تستعد لها امي من قبل الاذآن الأول لتدخل في صلاة الليل. بعد أن تصلي الفجر وتشرب الشاي تشيل سريرا الاسمو (حسن عدس) الاشتريناهو ايام النزوح ببورتسودان تشيل سريرا وتمشي بيهو الراكوبة وتضعه في مكانه المفضل وتكمل نومة الضحوية وانا الان اجلس على ذات السرير واشم رائحة امي ثم تقوم لتصلي الضحى بصورة راتبة.
فيحين موعد الفطور ثم صلاة الظهر ثم موعد (الجبنة).
امي كراعا طويييلة.. يمة في الحرب دي المعزي بالتلفون ماضروري تمشي الناس تعذر بعض لا مروة لا قروش. فترفع أصبعها بصورة الفناها وتقول (حاشا والله ما بخلي اهلي وحبااني انتن ما بتحمني الا كرعيني ما يشيلني).. لك الله يا أمي الدنيا كلها بكتك… يمة انتي توفيتي يوم الجمعة حيث لا حساب.. بخيتة وسعيدة يمة ربيتي اليتامى وقد قال رسول الله صل الله عليه وسلم (انا وكافل اليتيم كهاتين في الجنة) وأشار إلى اصبعيه.
اللهم اجعل امي في سدر مخضود وطلح منضود وظل ممدود وماء مسكوب وفاكهة كثيرة لا مقطوعة ولا ممنوعة وفرش مرفوعة.. اللهم امين يارب العالمين… يا وكيل الغافلين وكلتك امي… نتلم يمه في الجنة ان شاء الله.
