وجه الحقيقة

*الفلاح.. : منارة ما بتنطفي*

ما مدسة عليكم انا كنت شاطرة ديد في جميع المراحل الدراسية.. كانت بينا منافسة مجموعة صاحبات و قريبات بنقرأ في مدرسة وااحدة بت ثريا أحمد الله التي أصبحت معلمة الله يرحمها وكذلك الأستاذة مساجد والمهندسة الكيميائية بثينة الشاطرة لدرجة ما بترضي واحدة تسبقها في النتيجة.. كنا بنشف منها إجابات التمارين الرياضية.. انا عقدتي كانت الكيمياء والرياضيات لكن كنت بجيب حق الحكومة.
انا كنت شاطرة لكن خطي زي اليوم الاسود. ماعاوزة اقول زي وشي لانه وشي سمح😍 وبشخبط… وكان استاذنا سليمان الأحمر بدرسنا العلوم والعربي في المتوسطة على ما اظن.. كان بجيب الكراسات بعد التصحيح ويقول لي مقفلة المادة لكن كراسك زي ملاح الرجلة 😂 انا كنت فاكراهو بشكرني لاني كنت بحب الرجلة بالكسرة اتاريهو بنبز في كراسي😢 .
سليمان كان حنين مازي استاذ احمد إنجليزي.. داك عادي بفن الطالبات بالشبشب لو علبهم شي..انا كنت بعرف الإجابة لكن من الخوف بقلب الحروف فبقول لي معليش معليش.. بتذكر ثريا دخلت القاك زميلتنا نعمات بين العين والنظارة في الحصة قام فناها بالشبشب وقال ليها بغضب (كحليها كحليها) أما أحمد التاني أحمد عبدالله بتذكر جلدني جلدة حارة لانه ضبطني بملي واحدة في الإجابات بالشباك بعد طلعت من الإمتحان.. خليتك لي الله يا هناية. أما استاذ نور الدين وبشير ملاس ومحمد فاروق فكانوا كالنسمة.. معليش ماقدرت اذكر كل المعلمين والمعلمات لانه الحديث عن (الفلاح وربما نعود لاحقا.
اها نحن كبرنا وبقينا صحفيين عشان كدة لازم اكتب عن مدرية استاذ سليمان من باب رد الجميل ولما أقول “مدرسة” بتذكر الفصل والسبورة والحصص البتطير. لكن لما أقول “الفلاح” في تريعة البجا بتذكر حاجة تانية خالص.. بتذكر بيت.
بيت كبير فاتح أبوابه لعشرة قرى. السليمانية شرق والعسال وغمار وأم رباح وشكرالله واللدية وقبل جاي ودبلول وكجبي. كلهم بيجوها كل صباح عشان حاجة واحدة بس: ينجحو. وينجحو فعلاً. من يوم اتأسست وهي ماشة بنسبة 100% في الشهادة السودانية. دي ما صدفة. دي شغل مؤسس.

السر وين؟ السر في راجل اسمو سليمان علي الأحمر

أستاذي.

سليمان الأحمر ما مدير ساي. دا ربان سفينة. بحزم وأبوة في نفس الوقت. لو شاف طالب سرحان بعرف. ولو شاف أستاذ مقصر بقيف ليهو. انضباطو هو الوقود الخلى المنارة دي ما تنطفي حتى في عز الحرب والظلام.

ومعاهو زول تاني اسمو إبراهيم المليح. صاحب الرؤية. الزول البنى من لا شيء عشان أهل تريعة البجا ما يتغربو عشان يتعلمو أولادهم. قال ليهم “التعليم هنا.. والنجاح مضمون”.بتذكر عم المليح والدو ماعارفة مات ولا حي لكن ربنا يرحمو على اي حال.. عم المليح ده ماسك كافتريا المدرسة ايام أزمة العيش كان يعمل لينا رز باللبن عشان مابنقعد بدون فطور.. راجل عجيب. ❤️

نرجع الفلاح هي ما بتدرس منهج بس. بتربي قبل ما تعلم. الطالب البطلع منها بكون محترم معلمو، بار بأهلو، خايف على وطنو. ودي براها شهادة أكبر من أي نسبة.

في زمن بقى فيهو التعليم تجارة، وفي زمن المدارس بقت همها القروش قبل الطالب، قامت منارة في جبل أولياء قالت لا. قالت الهدف فلاح. والفلاح دا نجاح وفلاحة في الدنيا والآخرة.

عشان كدا لما أسمع زول يقول “التعليم انتهى في السودان” ببتسم وبقول ليهو: تعال تريعة البجا. تعال شوف الفلاح. تعال شوف الأستاذ سليمان وهو بقيف قدام الطلاب كل صباح زي الأب الخايف على أولادو.

دي ما مدرسة. دي رسالة. ورسالتها واضحة: لو في زول واقف صاح، البلد دي لسه بخير.

تحية إجلال للأستاذ سليمان علي الأحمر.. منار جبل أولياء. ولكل معلم لسه شايل الطبشيرة وشايل هم الطالب قبل هم المرتب.

وبكم يا معلمينا أنار الله عقول أبنائنا.