وجه الحقيقة

*مرور السودان قلبو ابيض وبلبس ابيض*

كنت عاوزة احكي النكتة دي في مداخلتي بمنبر الشرطة الدوري رقم 4 الذي استضاف الإدارة العامة للمرور لكن التزمت بتوجيه سيادتو دكتور أيوب بالدخول في السؤال مباشرة نسبة لقرب إنتهاء الزمن ولكن ما مشكلة حا احكيها ليكم هسة.. اسمعو قالو في واحد سايق عربيتو وماشي في الشارع وهو من النوع الشراني داك فوقفو فرد المرور (ياخينا رخصتك وشهادة البحث) فاتلفت يمين وشمال وبطنو فارت ونفذ طوالي لكن قال للعسكري (والله البلد دي ما فيها ارجل مني غيرك😂).
الكلام ده زمان ياجماعة ناس المرور الكنا بنخاف منهم ديك ماموجودين الان.. تغيرت الصورة النمطية لافراد المرور.. أصبح التوعية والإرشاد هو اسلوبهم الذي يحرصون عليه أكثر من حرصهم على تحرير المخالفة. أيضا سائقي المركبات أيضا أصبحوا حريصين على ترخيص مركباتهم وتجديد رخصة القيادة. خاصة سائقي المركبات العامة لأنهم في الغالب الأهم مستأجرين فيها واي مخالفة تكون خصما من جيوبهم .
قيادات المرور في المنصة الذين اثروا المنبر بالنقاش وكل واحد فيهم حافظ لوحو اللواء معتز كديرو مدير دائرة الشؤون العامة، اللواء حاتم المجذوب مدير دائرة المرور السريع، اللواء أيوب عبد الرحيم مدير دائرة مرور ولاية الخرطوم، العميد فيصل الرهيد مدير الدائرة الفنية وقبلهم مدير الإدارة العامة للمرور اللواء حاتم محمود تحدثوا بلغة الأرقام اصلا المرور أرقام ولو ما عندك رقم لوحة ورقم شاسي ما بتمشي في البلد دي لو جا الجيش.
مدير الدائرة الفنية العميد فيصل الرهيد قال : بلغ إجمالي المركبات المسجلة 2,124,750 مركبة، وإجمالي رخص القيادة 3,161,599 رخصة.
وبعد الحرب تم تسجيل 841,707 مركبة و 341,364 رخصة قيادة جديدة.
كما تم الإبلاغ إلكترونياً عن 68,312 مركبة وتم العثور على 11,058 مركبة منها.
أهمية هذه الأرقام برزت بعد الحرب ونهب سيارات الخرطوم والجزيرة. بواسطة اشاوذ مليشيا الدعم الصريع. في القلب حسرة لكن السيارات ما اهم من الأرواح والحاجة البشتروها بالقروش بتتعوض. ياخسارة على الأرواح التي فقدت. بالمناسبة المرور قدم 40شهيد على راسهم فريق شرطة استشهد بداية الحرب وهو بالزي الرسمي يؤدي واجبه تقبلهم الله مع الصديقين والشهداء وحسن أولئك رفيقا.
مدير الإدارة العامة للمرور اللواء حاتم محمود أعلن عن استعادة البيانات الكاملة للمركبات وإطلاق حزمة منصات رقمية شملت “سالم” والبلاغ الإلكتروني والتحصيل الإلكتروني، بجانب مشروعات للسلامة كالتتبع الآلي والرادار، مع ضوابط جديدة لنقل الملكية ومطالب بفتح نوافذ ترخيص لعربات الخرطوم بالولايات.
اصلا الشرطة اول مؤسسة استعادت بياناتها وكم حدثنا اللواء سامي مدير السجل المدني وقتها في بورتسودان عن معركة استعادة الهوية َكيف فعلتها الشرطة. يعني الإنجاز ما غريب عليهم.
كنا عاوزين نتجرجر معاهم في قصة العربات المسروق دي وجرجرة الترخيص لكن الزمن لم يسعفنا ولكن لغت نظري حديث اللواء حاتم انهم كانوا يرغبون في ترخيص عربات الخرطوم الموجودة بالولايات عبر نوافذ الترخيص هناك لكن الوالي أو الولاة ما متأكدة رفصوازوهسة العربات دي هناك حاسمة على حل شعرها؟ ليه ياسعادتك يعني الواحد يجي من الولايات يرخص في الخرطوم َويرجع ولا شنو 🤔