" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

*أحلام رومانسية بعودة الصحافة الورقية في مركز الفضاء الفضاء العالمي
كنت اتمنى ان اكون حضورا ضمن المشاركين في ورشة (واقع الصحفيين) التي نظمها مركز الفضاء العالمي بقيادة الأستاذين الشاعر مختار دفع الله وعادل سنادة ولكن شاءت إرادة الله أن أكون خارج البلاد ولعله تدبير الله لأنني حينها سأكون مشاركة في ورشة احترمها ولكني اختلف معها في الرأي.
سمعنا في ختام الورشة الامدرمانية عن “ترتيبات لصدور عدد من الصحف الورقية في القريب العاجل” وعن قناعة لدى الدولة بضرورة عودتها باعتبارها “وثيقة رسمية”.
احترامي الكامل لكل من تكلم، ولكن خلوني أقولها بالبلدي: الصحافة الورقية خلاص.. ماتت.
الحقيقة المرة إنو الصحف كانت بتحتضر قبل الحرب أصلاً. الطباعة غالية، الورق غالي، التوزيع بقى مستحيل، والقارئ السوداني هجرها من سنين ومشى للتلفون. هسه الحرب جات كملت على الباقي.
اليوم المنصات والصحف الإلكترونية هي المسيطرة. الخبر بطلع في ثانية، الصورة بتوصل، الفيديو بفضح، والرأي بعمل تفاعل. منو لسه ح ينتظر الجريدة بكرة الصباح عشان يعرف الحصل الليلة؟
حتى فكرة “الوثيقة الرسمية” بقت مضحكة. الأرشيف الرقمي أوثق وأأمن. الجريدة بتتقطع وبنلف بيها المرارة وبتضيع وبتحرق، لكن السيرفر ما بحرق.
طيب وين المشكلة؟ المشكلة في الخطاب الرومانسي البنضحك بيه على نفسنا. نتكلم عن تمويل وعن سيارات ميسرة وعن لجان، وننسى إنو مافي قارئ. مافي زول ح يشتري جريدة بـ 2000 جنيه وهو بقدر يفتح 10 مواقع مجان.
أنا مع تدريب الصحفيين، ومع توحيد الصف، ومع “ما ناكل لحم بعض” زي ما قال أستاذ عادل سنادة. بس ده كله ممكن يتم في الفضاء الرقمي. ندرب الناس على الصحافة الاستقصائية الإلكترونية، على البودكاست، على صناعة المحتوى، على توثيق “حرب الكرامة” في منصات تصل العالم كله، ما بس الزول الشايل الجريدة في السوق.
قيادة الدولة عندها قناعة بعودة الورق؟ دي قناعة متأخرة 10 سنين. العالم كله مشى لقدام ونحن لسه بنحلم بمطبعة.
الصحافة ما بتموت، لكن الورق هو المات. والصحفي الشاطر هو البمشي مع الزمن، ما الببكي على الأطلال.
فلندع الشعارات جانبا عزيزي مختار وسنادة .. خلونا نبني صحافة المستقبل، لا ننعش جثة الماضي.
