" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

*إلى حكومة الألم مرة أخرى.. ورونا جمال خطوتكم*
كتبت لقرائي في الفيس وقلت ( واحدة مشت للدكتور قال ليها عندك مقابلة مرة في الأسبوع.. قالت ليهو يادكتور انت قايل لبس الكارينا ده هين ؟انا كمان كنت عاوزة اطلع لايف عشان اللايف بجيب الناس لكن اللايف ماهين ما بقدر اتلبس واقشر واطلع لعيونكم الجميلة عشان كدة احسن لي اكتب عمودي بتوب الهزاز الواحد الجبتو من الخرطوم..)
الزملاء قالو لي ما أحلى الكتابة بتوب الهزاز وإحدي الزميلات قالت لي جري ليك ملاية ولا توب هزاز وتعالي اكتبي
المهم عاوزة اكمل عمودي بتاع حكومة الألم لاخير فينا ان لم نقلها ولا خير فيكم ان لم تسمعوها.. عرض اكتافكم!!
وسبب الاسترسال أو الجرجرة زي ما تحبو ان بعض أصدقاء صفحتي اتهموني بالنوم عشان قلت سؤال السكر 50كيلو داخل على 400 وفي الحقيقة حصل 500 جنيه كما أفادوني وافادتني شقيقتي وقالت رطل البن أو الكيلو ماعارفة حصل 35الف والمكرونة 10الف ،رطل زيت الفول 12 الف وهلمجرا.
انا عاد شن عرفني ما قاعدة اتسوق فقط بحول القروش لاخواتي وهم بشترَو احتياجات البيت يعني ما ممكن انا اشتغل ومطبقتي تشتغل وهم مقدرين الحتة دي.
اتاريني برسل المصاريف وكل يومين يقول لي انتهت وانا اقول ناس بيتنا ديل ببالغو في الصرف وهم بختشو يقولو لي انتهت في حين انا ما عارفة السوق عامل كيف يعني انا البالغت ما هم.
أحد القراء الكرام قال معلقا (المشكلة انه مافي شغل الناس قاعدة بدون دخل، واحد صاحبي قال لي أمريكا مش رمت قنبلة نووية في اليابان، قلت ليه رمت اتنين، قال لي خلاص ترمي فينا واحدة تريحنا.)
َوواحد كتب جاتنا فرصة نموت كلنا بالكورونا لكن برانا سويناها في نفسنا ولبسنا الكمامات!!
شوفو ياحكومة العلل كما سماها زميلنا رمضان محجوب شوفو وصلتو المواطن لي َ وين؟ لمرحلة تمني الهلاك بالقنابل النووية
. هو طبعا ماصادق ولو سكاهَو كلب بعملها في روحو قبل يجري َلكنه تعبير عن الضيق يعني يلقاها من وين ولا من وين؟ لقمة العيش ولا من مصاريف المدارس ولا المستشفيات ولا غير و ولا غيرو الخ.. الخ
كلما نظرت إلى صورة رئيس الوزراء وهو متفن في الواطة تذكرت حالي_ ولو اني مابقدر اتفن زيو كدة_ تفينة زول فتران غلبو اليسويهو وفقد (الأمل) الذي اتخذه شعارا لحكومته ولسان حاله كلسان حال البعاتي (فشلنا… فشلنا) طيب مادام ده حالك مصر تكنكش في جنازة البحر دي مالك؟
غايتو أجمل تعبير للفرجخة في الواطة كتبو واحد قال (لم الميكانيكي يقعد قعدة زي دي اقنع من عربيتك (ماعارفة قاصد شنو لكن المهم..)
يا كيمو مقدرين شعورك ورغبتك في انعاش (الأمل) في نفوسنا وبثه في روح الاقتصاد السوداني لكن انت زول ترطيبة وراحات ماابتقدر علينا وعلى بلدنا دي عشان كده اتفكفك
وسلم المفاتيح لتربالي عارف دروبها.
سيدي الرئيس لقد هرمنا ونحن نشاهد المستوردين يستجلبون من المنافي عشان يتعلمو فينا زي راس اليتيم البتعلمو فيهو الحلاقة. ولنا في تجربة حمدوك عظة واعتبر. صحيح شتان بين حمدوك العميل وبين كيمو الرجل الوطني الذي يهتف دائما جيش واحد شعب واحد ولكن ا لوطنية وحدها ما بتعمل طحنية وراس اليتيم الآن اقصد الشعب غلبتو العيشة(الرغيفة الواحدة السقطت البشير (ماعافيين ليكم يا ناس عطبرة).
ماعارفة اقول شنو؟ خليني ساكتة أحسن.
