وجه الحقيقة

فوكس/ هويدا حمزة / الزملاء الجواسيس.. خجلت ليكم 😪

لم تكون من عشرة سنوات ما رسلت لي ولا مرة تسأل مني ،ولم اكون أجريت عملية استئصال كلية وبرضو ما سألت مني بالتلفون ناهيك عن الزيارة ،ولم تكون اختي توأم روحي الزرعت الكلية ماتت وانت برضو ما عزيتني ولو بالتلفون ،ولم اكون اتزوجت وانت ما باركت لي ولو بالتلفون،لم اكون مريت بكل الظروف الحلوة والمرة وانت ما عبرتني لأنك أساسا ما صاحبي ولا من زملائي المقربين تفتكر لم ترسل لي الآن وتسألني أنا قاعدة ولا طلعت ولم اقول ليك طلعت وتاني تسألني جوة ولا برة السودان ولم اقول ليك الليلة مالك اتذكرتنا وتقول انك حبيت تطمن علي في ظروف الحرب دي تفتكر حا اصدقك؟لو صدقتك يكون في رأسي قنبور !!
نحن لم طلعنا من الخرطوم دي ما خوف من الموت لأنه الزول بموت مرة واحدة لم يومو يتم غير كدة لو كسرو رقبتو كشش ما بموت لكن طلعتنا الخيانة والجواسيس ‘الجواسيس اللي هم زمايلك وليتهم يتجسسون عن مبدأ أو عقيدة ولكن نظير دراهم معدودة!! اسة عليكم الله القروش دي بتنفعكم؟بتاكلوها وانتو مطمئنين؟ياخ والله خجلت ليكم لدرجة اني ما مبسوطة وانا بكتب في الكلام ده 😪
سمعنا بتجسس لجان المقاومة وكشف سكن الضباط والضباط المتقاعدين باعتبارهم كيزان ورغم انها حاجة شينة شديد منهم وما بتشبهنا كسودانيين الا انه حقتكم مبااالغة في الشنا ،تتجسس على زميلك؟لصالح منو؟لصالح المليشيا المتمردة؟
اقسم بالله بداية الثورة لم كانو ناس الأمن مطاردين الثوار وجو مارين بالصيحة دخلناهم وقمنا ليهم من كراسينا وقعدنا اي ثائر قدام كمبيوتر وتعرضت زميلاتي ام سلمة العشا وهالة نصر الله للضرب أما أنا فقربو يرفعوني في البوكس عشان اتفاصحت معاهم لولا أن اجتمعت حولي الزميلات الحبيبات وحلن بيني وبينهم.

قائد الدعم السريع تمرد لأجل الديموقراطية فلماذا يضيقون الآن بالديموقراطية ؟لو كان الدعم السريع يقاتل في اي جبهة أو حركة مسلحة أخرى لناصرناه لأنه كان الأقرب للجيش وكنا نقوم بتغطية كل انشطته ونحفظ لحميدتي مواقفه بعد الثورة وفي إغاثة المنكوبين من السيول والفيضانات وكنا نحب خطاباته الجماهيرية العفوية وامطارو البدون براق ومطر الحصو والمصارين الإتهردن وياما قمنا بتغطية أنشطة الدعم السريع لم كان حكومة ولكن الآن الدعم السريع تمرد على الجيش والجيش عندنا خط أحمر فماذا تتوقعون من صاحب قلم حر ؟أن يقف مع المتمرد ضد الجيش ؟كلا وحاشا الا صاحب قلم رخيص هو من يفعل ممن نعرفهم وكانوا يعملون مع دول أجنبية(إفريقية )منذ زمن طويل منذ بداية عهدنا بالصحافة ولا علاقة لهم بالدعم السريع ولم نرهم في انشطته ولكن يبدو ان علاقة جديدة نشأت معه وبالمناسبة ما نفر ولا نفرين سألوني.ارجوكم ما تسألوني مرة تانية ، انا ما عاوزة زول يسألني طلعتي ولا قاعدة مشيتي وين؟انا طلعت ومشيت باخموت ومنها للسما اللحمر زاتو.