" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

فوكس / هويدا حمزة / ورجغة الصوارمي وهضربة عبدالرحيم
1
يا جماعة زول يكلم الصوارمي ده يقول ليه بطل الورجغة وخبرتك العسكرية بدل
تعمل لينا بيها. (هيديق)على قول المرحوم وتكبها لينا في الوسائط امشي نفذ عمليا فى الميدان مع الجيش ..ورجغ ورجغ ورجغ ياخي لم كنت ناطق بإسم الجيش ما كنت بتنضم قدر ده!!!
2
يوم وقفة عرفة كنت في الطريق الى جبل اولياء وصادف ذلك ضربة الإحتياطي وإغلاق الطريق مما اضطر السائقين للنزول من الطريق الاسفلتي واتخاذ مسارات داخل القرى للعبور وبالفعل اوقفنا ارنكاز داخلي للدعم الصريع وجاءنا دعامي مفعوص قال لينا (البرهان فز انتو برضو فازين)فقلت له (عاد يا ولدي كيف ما بنفز ؟نقعد لم نموت بي طلقة ولا دانة)فضحك وقال لنا( كل سنة وانتو طيبين)فرددناها له وخشمي ماكلني قربت اقول ليهو (البرهان امبارح طالع لايف خلي حمدتي يطلع لايف زيو)يالطيف مسكت لساني وختيت الخمسة فوق الكوكة الروح حلوة عاد .
تذكرت الواقعة وانا استمع للأهطل الاسمو عبدالرحيم دقلو في حديثه لقناة (العدس)سلامة العدس بس هبلة ومسكوها طيلة لغ لغ لغ ..ياخوانا اللمبي ده العرفو درب القنوات منو؟
ههههه ضقلو قال البرهان شرد بسفنجة وبالداخلي شوفو لغة القائد الثاني للمليشيا الذي أصبح الآن القائد الأول بعد انتقال شقيقه إلى دار الفناء.طيب مالك ماقبضتو وكت شفتو ؟اها نسيت انك الوكت داك شتت إلى نيروبي. نسى عبدالرحيم أن مستشاريهم قالوا ان البرهان خرج بواسطة الدعم الصريع وقد كانوا يروجون إلى أنه داخل مرة حفرة ومرة بدروم .
المهم يااللمبي الفارس مرق وانا متبرعة ليك بكدمول (مرقة لبرهان )ولا تحب مرقة ماجي اقصد مرقة البرهان ؟
البرهان مرقو الجيش يعني كنت عاوزو يمرق بالباب عديييل ؟طيب انت صيجت مالك؟ماكان تمرق بالدرب العديل !!
بعدين ياجماعة عبدالرحيم ده ما عارف يعني شنو وزارة الخزانة الأمريكية وكل القدر يقولو انه القرار (مجحف) وأنه الجهة الاصدرتو (ما اتانت) عشان كدة ياناس قناة (العدس)بتهدرو زمنكم مع جاهل تلفزيون مابكون شافو في حياتو الا بعد الثورة اللعينة .
كيف تحمون المواطنين ياعبد الرحيم وجنودكم قتلوا الأرواح واحتلوا البيوت ونهبوها واغتصبوا الحرائر ؟كلام غير عاقل لكنه جائز من مجنون ..غايتو الشافك قال عبدالرحيم لو سلمت عليهو يشيل معاك الفاتحة.
