وجه الحقيقة

يوميات نازحة / هويدا حمزة

(1)
في تنوير صحفي لوالي الجزيرة السابق اسماعيل عوض الله العاقب حلف بالتقطعو إنه الجزيرة آمنة وإ نه نمله ما حاتدخلها فصفقنا له وعندما اتيحت الفرصة لقائد الفرقة الأولى مشاة للواء ركن احمد الطيب ليقول كلمته قال بالحرف الواحد (نحن ما ناس كلام اتكلمو انتو نيابة عننا ..نحن ناس عمل وعاوزنكم تطمنو الناس انه السودان ما حا يؤتى من قبل الجزيرة )فصفقنا له كذلك وطلعنا مانشيتات بكلام الرجلين .
الواقع الآن اثبت ان تلك التصريحات كلام جرايد زي مابقولو فالجرايد مفتونة بالمانشيتات الرنانة حتى وإن لم تكن تحمل الحقيقة فهاهي مدني قد سقطت بل استسلمت بكل سهولة بعد انتصار ساحق للجيش عقب محاولة من الجنجويد لغزوها من ناحية الشرق فاحتفل الجميع ونحرت الذبائح في مارنجان حيث نزحت واسرتي الكبيرة مع أسر أخرى داخل ثلاجة وامضينا يوما شاقا في العراء في ام سنط وسنعود لذلك بالتفصيل خلال يومياتنا هذه . اقول إنطلقت السيارات تجوب الشوارع (تيييت تييت تييت) أصبحت ترند تلك الأغنية الحنينة من (من قلب المحنة من أرض الجزيرة برسل للمسافر اشواقي الكتيرة
وقد اهديت هذا المقطع للشعب السوداني بمناسبة انتصار الجيش في مدينة ود مدني و ولناس مدني الراكزين وقبل كل أولئك اهديتها لقيادة الجيش وجنده .. غنيناها ورقصنا على انغامها فالمدينة أصبحت موطننا بعد أن غادرنا الديار مرغمين نازحين من الخرطوم التي اغتصبها شياطين الجن فلحقوا بنا في مدني التقول طالبننا تار ربنا يحرقهم أكتر مما اتحرقو.
مدني باعوها؟!!لا لا الجيوش لايمكن تبيع الأوطان ،ده جيشنا ونحن أهلو وبنعرفو ولا يمكن نشك فيهو أو نخونو مستحيل مستحيل !!
طيب الحصل شنو بالضبط؟هل الجيش اتغلب؟والله ماعارفة !!لكن ما ظنيت ،الجيش ما اتغلب في الخرطوم كرش الفيل يجي يتغلب في مدني الصغنونة؟لا يمكن!!طيب فهمونا !!نحن ذاتنا ما فاهمين وفاقد الشئ لا يعطيه!!

نواصل
ملاحظة:تأتي يومياتي متاخرة نسبة لانقطاع الشبكة والكهرباء..فعذرا.