وجه الحقيقة

*فوكس* قيس ضغطك حصن نفسك*هويدا حمزة

قريب لنا لم يكن يحب الاطباء بتاتا ولا يذهب إليهم ويبرر بأنه(تمشي ليهم نصيح تجي منهم مرضان)اها انتو كمان ياناس الجمعية السودانية لارتفاع ضغط الدم جيناكم نصيحين عشان نغطي ليكم مؤتمركم طلعتونا عندنا ضغط !!غايتو انا نفدت بسنة من هذا المرض القاتل الصامت ولكن غيري كثر شايلين المرض وحايمين بيهو دون أن يعلموا باصابتهم . استاذنا عاصم البلال وقف الف احمر وحلف ستين يمين ما يقيس الضغط لأنه يمر بظروف حرب والمقياس في هذه الحالة غير مبرئ وقال ما يقيس الا لم يرجع للحالة الإنسانية ويعيش ظروف طبيعية وفي الحالة دي الميزان بكون عادل .ورقم امتناعه الا أن الزميل هيثم الريح قدمه ليلقي كلمة المعلمين باعتباره شيخهم. ويبدو أن عاصم رفض لم عرف انه الجميلات البقيسو الضغط بسالو عن العمر.
وزير الصحة دكتور هيثم طلع ضغطو ظابط رغم (الدغوتات ) التي مر بها في سبيل استقرار الخدمة الطبية ماعارفة القياس حقيقي ولا جاملوهو عشان هو الوزير!! المهم دقر ياعين.
وزير الصحة ونائب مدير الجمعية السودانية لارتفاع ضغط الدم د. هند مأمون بحيري عولا على الإعلام في التوعية بمخاطر هذا الصامت القاتل ولن نخذلهما.
يا جماعة الله معدل انتشار المرض وسط السودانيين يساوي 44%
وذكرت هند ارقام كثيرة جدا لم أستطع كتابتها لأنني كنت متوترة من ارتفاع ضغطي هذه النسبة غير حقيقية بالطبع لأنها تمثل الذين قاموا بقياس ضغطهم بينما هناك آخرين لا يعلمون ولا يريدون أن يعلموا أنهم مرضى .
ياجماعة المرض ده بأثر على العيون والراس والكلى والقلب يعني نهايتو الموت لذلك قيس ضغط تحصن نفسك لذلك يجب أن نهتم بتغيير نمطنا الغذائي وكثير من العادات السيئة من أكل الدهون والترطيبة تحت المكيفات بالله التقول ما نازحين. وبرضو بنقول ليك قيس ضغطك حصن نفسك