" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

*فوكس* هويدا حمزة *بين ببغاء الشيوعي ومجدي سوداتل*
قال ليك واحد شيوعي ايام الإنقاذ عندو ببغاء وبكره الحكومة كراهية شديدة وكلامو كلو الكيزان الحرامية سرقو البلد ديل بغورو متين.. اولاد الكلب المفسدين السراقين. الببغاء بقى حافظ الكلام دا وبرددو طوالي يوم الببغاء طار منو ومشى ركا في بيت رائد في جهاز الامن وشبكو ليك الكيزان الحرامية اولاد الكلب سرقو البلد ونهبوها ديل بغورو متين داهية تشيلهم ..قبضو ليك الببغاء وعشرة دقايق بس عرفو ليك سيدو منو والتاتشرات دورت لى بيت صحبك دقو الباب جاهم مارق لقى ليك عشرة تاتشرات وكمية عساكر وسألوهو الببغاء دا بتاعك؟؟ عاين للتاتشرات والعساكر والضباط ..قال ليهم آاي لكن انا طردتو من البيت عشان مختلف معاهو سياسيا
سبحان الله صادفتني هذه الطرفة في الوقت المناسب وأنا أهم بالتعليق على حديث الرئيس التنفيذي لشركة سوداتل أو سوداني الأستاذ مجدي طه.. لا حظو انا قلت حديث مجدي َوليس حديث سوداني فهناك فرق كما تقول صديقتنا زميلتنا الكاتبة الصحفية طاعمة الحديث الأستاذة مني أبوزيد هناك فرق بين المؤسسة والفرد.
وجدت وجه الشبه كبيرا بين سلوك الببغاء و(حال) مجدي لم يدخل في الفتيل. برضو انا قلت (سلوك) و(حال) يعني اتكلمت عن الصفة وليس الموصوف.
كنت من المتابعين وقد جلسنا واستمعنا للواء سامي الصديق مدير السجل وقتها عن كيف استعادت الإدارة الهوية السودانية بمجهود خالص للشرطة السودانية.. انا طبعا ما عندي دماغ للخوض في الجوانب الفنية ولكن من أراد يمكنه ان يعود للعم قوقل سيجد أحاديث سامي مبذولة ولكن بصفق على قدر قدرتي (اي لوكال لكن معليش المهم الرسالة تصل).
تحدث سامي فطارت باحاديثه الأسافير ولم يخرج مجدي وقتها ليقول له (كدددب) على قول نائب الرئيس الفريق مالك عقار ولم يقل له (فشر.. بالمصري نحن سوداني ديل من استرد الهوية أو شاركنا في استردادها)!!؟ فلماذا خرج مجدي بهذا التصريح غير المقنع للبعوضة ناهيك عن البشر الآن؟؟؟؟!!
طيب موقفك شنو يا مجدي مع حفظ المقامات لو ظهرت مشكلة في الهوية أو السجل وخاصة الخيانة ومن أعطاك مفاتيحها؟ اي انتو عندكم سيرفراتكم وحاجاتكم لكن الشرطة برضو ما ممكن تسلمكم معلوماتنا بثقة عمياء والا نحن ذاتنا مابنثق فيها وامكن تجيب لينا عرب الشتات على اساس انهم سودانيين؟
هو وي يا مجدي انا خايفة يوم تعمل زي سيد الببغاء الشيوعي وتقول (ده ما انا القال كدة… ده مجدي ذكاء اصطناعي).!!.
تحياتنا لشركة سوداني العملاقة فهذا الحديث ليست معنية به.
