وجه الحقيقة

*فوكس* هويدا حمزة *إثيوبيا يا جارة السوء.. تتبلي بس *

(الرفيق قبل الطريق) و( الجار قبل الدار) هذا المثل الدارج يجسد الحقيقة الازلية بأن تتثبت من أخلاق جيرانك قبل أن تختار مكان سكنك الذي تنتويه لأنك ربما تضطر لان تغادر بيتك حين تكتشف ان جيرانك كجيران نبينا وحبيبنا المصطفى صصل الله عليه وسلم الذين كانوا يضعون له القذارة أمام بيته وفي طريقه وبما انك لا تتمتع بصبره ولا أخلاقه صل الله عليه وسلم فلن يكون أمامك سوي المغادرة.
ولكن ماذا بشأن الجوار الدولي يعني مثلا نحن نقوم نشيل السودان ده ونرحل بيهو من جوار إثيوبيا المؤذية وكذلك تشاد؟
إثيوبيا الجارة التي كانت شقيقة قبل مجئ ابي أحمد لسدة الحكم – يسد نفسو}.
حسنا كشرت الحكومة عن انيابها وهي تهدد بالدخول في مواجهة مفتوحة مع إثيوبيا بعد الحركة الجبانة العملتها امس بعد أن ثبت لها ان إستهداف مطار الخرطوم ومنشآت أخرى تم استهدافها من خلال الاراضي الإثيوبية (مطار بحر دار) بمسيرات المليشيا اقصد مسيرات الإمارات الله لا كسبها ولا كسب شيطانها بن زايد الهي وانت جاهي يتغرغر ويتزرز يكوس النفس يبقى ليهو صعب يكوس الموت ما يلقاهو ومعاهو آبي احمد ومعاهم حميرتي وزمرتو قادر يا جبار.
امس وزير الخارجية أعلنها داوية اننا على استعداد للدخول في حرب عدييل كده مع إثيوبيا والرهيفة اتنقد ولا بهمنا (إثيوبيا الهوينة دى وانت يا آبي أحمد عارف انه التغيير في افريقيا يبدأ من السودان العظيم فلا تستهين به المتغطي بالإمارات و الدعامة عريان وياهم ديل أهلهم لحمهم ودمهم تركوهم وجاءوا لحضن الوطن وقد ايقنوا ان حرب الجنجويد وكفلائهم خاسرة وكان إنسلاخ النور القبة قاصمة ظهر للجنجا وكفيلهم. اصلو المسيرات دي حراق روح ساي ونحن ما مارقين من الخرطوم تمطر مسيرات تمطر دانات الموت واحد وان تعددت الأسباب والروح عند رب العالمين.
و لتبدأ أولى خطوات التصعيد بسحب سفيرنا من هناك فعليا كما هدد الوزير انا ماعارفة السفير قاعد هناك لي هسة لشنو.. كلمه خلوهو يبقج سريع طالما ثبت بالأدلة الدامغة تورط إثيوبيا في العدوان على جيرانها حسب الناطق الرسمي باسم الجيش السوداني العميد عاصم عوض إن القوات المسلحة الذي هدد بأن السودان سيرد الصاع صاعين يا سعادتك السواي ما حداث يلا ورونا همتكم مع الحبش ديل الله لا كسبهم
ما تقول لي قانون دولي ولا مجتمع دولي ديل نحن قنعانين منهم.. بلوهم بس فالبل يسع الجميع
اسحبوا السفير واسحبوا اغانينا العندهم اسحبوا وجداننا الذي تعلق بتلك الاغاني باللهجة الحبشية و خليهم يغنو ظلموني الحبايب. وبرضو دي اغنية سودانية.

صحيح كما تفضل وزير الخارجية السودان لا يريد أن يبادر العدوان على دولة ولكن من يعتدي علينا سيتم الرد عليه) ياخوي البشرط دمورك شرط حريرو.. ولي قدام.