وجه الحقيقة

*أوو كاش.. اللون الأخضر نزل تلفونك*

(ضاع عمرنا ونحن بنفتح تطبيقات غلط) العبارة مقتبسة من البت المصرية وهي بتعمل الكيكة أو الفراخ.. على قناتها في يوتيوب وهي عبارة ترويجية أكثر من كونها واقع ولكن في حالتنا الحق يقال لو صدقوا ما وعدوا فالحياة ستكون أكثر سهولة مع أو كاش الجديد. الذي احتفل به بنك أم درمان الوطني ظهر اليوم في قاعة تزينت بالاخضر في فندق السلام روتانا اصلا انا بحب اللون الأخضر ويرتاح له نفسيا . المهندس المشرف على موقعي عندما ارسلت له الأشعار الأخضر نظير عمل قام به قال لي انتي لا تفوتي لاتموتي الأخضر ده حنان الأم عدييل قلت ليهو اها انا يتيمة وامي ميتة لها الرحمة والمغفرة والعتق من النار.
يكفي الأخضر فخرا انه لون الإنتاج
وانا أرى الأخضر يتراقص يمنة ويسرة وفي جميع الاتجاهات مسيطرا على المكان تذكرت الذي مضى قبل مجئ الثورة اللعينة ومعها القحتجنحويد.. احييا.. تاكلو الحمت رمت ياناس عطبرة هسة لو اكلتو العيشة ابو جنيه وحمدتو الله على النعمة ماكان احسن.. اها خمو وصرو بقن 4 بالف جنيه ومعاها حرب ونزوح وموت وانتو عارفين ما بوروكم.

نكون جادين شوية بالاخضر احتفلوا الليلة في السلام روتانا. نفس الأخضر بتاع بنك أمدرمان الوطني، بس المرة دي ما على اللافتات.. على تلفونك.

“الآن.. ما زي زمان” ده ما شعار ساي. زمان عشان توقف بطاقتك لازم مكالمة وانتظار وأعصاب. الليلة؟ ضغطة واحدة من التطبيق وانت مدير نفسك. نسيت كلمة السر؟ غيرها. تلفونك اتسرق لا قدر الله؟ لا داعي للقلق وقف كل شي وانت رايق وهذا ما بشرنا به احد شباب الفريق التقني في العرض التوثيقي للتطبيق الجديد والمدير العام بروفيسور عبد المنعم الطيب قالها ببساطة: البنك دا ح يفضل معاكم. وبالمناسبة هو ما بس بنك.. طلع كمان داعم تعليم ب 1600 سبورة وزعها للجامعات والريف. يعني معاكم في القروش، ومعاكم في السبورة برضو.
اما وكيل المالية د. محمد علي جمعة فوصف التطبيق بـ “الفاكهة”. والفاكهة دي طعمها تحويل برقم التلفون، دفع بـ QR، وكشف حساب لحظة بلحظة، وفتح حساب جديد بالرقم الوطني بس. يعني من غير جرجرة. وده الكلام المهم
اما الشركة الأوروبية الشغالة مع البنك فقالت : “دي البداية بس”. يعني لسه في فصول جاية للتطبيق، للداخل والخارج.

الخلاصة؟ الأخضر حق البنك بقى خفيف في يدك. اسمه “أووكاش لكل الناس”. نزلّه مجاناً من Google Play و App Store وجرّب براك.العندهم اوكاش يحدثو والما عندهم ينزلوهو
زمان كان البنك فرع تمشي ليهو الليلة البنك بقى تطبيق يمشي معاك.