" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

*اين سندس؟ *
عندما بدأت عملي كصحفية، كنت أجي من جبل أولياء الحبيبة للخرطوم. بعض الزملاء يتريقو ويقولو “لاحول ناس أطراف الخرطوم”. كنت أرد عليهم: نحن ناس الخرطوم الأصليين يا ملاقيط الولايات. جدي بنى الخزان والسجانة كانت فاضية. قالو ليهو احجز أرض فيها، قال ليهم “احجز في العشر” بضم العين. وكان بيتو في جبل أولياء عامر، وكل المدينة عامرة.. بيت ملك. الغريبة البتريقو كانو مأجرين.
سقت المقدمة دي عشان أقول: كل شبر في جبل أولياء يخص أهلها. منطقة تاريخية. لو قعدت مع عمنا عوض السيد حامد العبادي عليه رحمة الله، أو المعلم شريف حمد، كانو يحكو ليك عن جبل أولياء وتستمتعو بالحكاية. شخصياً فطرت في رمضان في بيت عمنا عوض السيد رفقة حبوبتنا الغرقة بت تير أيوب لها الرحمة. وثقتها في جبل أولياء ما بتتوصف. ما متذكرة كنت بتدرب مع أستاذي ود الجبل ربيع حامد ولا كبرت شوية.
قالو واحد مشمع في البص وزايغ من الكمساري. البص وقع في حفرة، فشك الناس شك الكوتشينة. الدفع مع الما دفع واختلط الحابل بالنابل. صاحبنا قام قال “بركة”.
نحن كمواطني جبل أولياء اليوم نقول: بركة الاتشكو. ونقصد مشروع سندس. المشروع الكنا بنسميهو “بؤرة الفساد”. تعالو قولو لي كضابة ووروني أثر المشروع على المنطقة وأهلها، بل على خزينة الدولة نفسها؟
الم يسموه مشروع تطوير وتنمية جبل أولياء؟ الم يكن من أهدافه رفد خزينة الدولة؟ لو الهدفين ديل اتحققو، كان جبل أولياء هسي مدينة عديل. لكن الحقيقة: رغم عراقتها مازالت أشبه بقرية كبيرة. مواطنها لسه بكدح عشان معيشة أولادو. مستشفاها الكبير لسه ناقصو الكتير، وناسها لسه بيمشو مستشفيات الخرطوم عشان يتعالجو.
أين سندس من كل هذا؟
الحصل باختصار: أراضي الملاك الحقيين اتسلبت وبيعت الغرباء عملوهو مصانع طوب بلوك ومزارع أصبحت مرتعا للفساد وتجارة المخدرات يديرها أجانب!
والمواطن طلع من المولد بلا حمص.
ما دايرة أعيد التفاصيل القديمة. دايرة أسأل بصراحة:
1. أين أولئك النفر هسي؟
2. ما هو الموقف القانوني لسندس؟ الما انتهت الـ30 سنة بتاعت الانتفاع ورد الحقوق لأهلها؟ حسب علمنا انتهت زمان. وسمعنا بالتجديد لـ90 سنة تانية.. يعني ليوم القيامة!
3. أين المهندس الطيب محمد الطيب؟ هل مازال مديراً لسندس؟ لو مازال تبقى مصيبة
4. لجنة التفكيك فتحت ملفات كتيرة بدعوى العدالة. لماذا لم تفتح ملف سندس وتعيدو لأهلو؟
فتحنا الملف دا من زمن المهندس الصافي جعفر ربنا يرحمو. نحن بنعامل الناس بأخلاقنا ما بأخلاقهم. وفتحناه في عهد الطيب الاشتكانا لنيابة الصحافة، وجاء مقر الصيحة فارغي وازبد رغم اننا حاورناهو وبعدين رخي لما لقانا جاهزين موية ونور للمحكمة.
وسنعيد فتح الملف تاني.
نتوجه بالسؤال للأخ والي الخرطوم: هل سمعت بسندس؟ لا أظنك جاهلاً. لكن نطمع في زيارة منك للمنطقة، تجلس مع أهلها وملاك الأراضي وتسمع منهم. وكلنا قناعة إنك ستنصفهم، ويسجلها لك التاريخ قبل أهلها.اخي الوالي ياتجينا يا نجيك.
ولك شكرنا.
