" الحياة اليوم " جريدة إلكترونية إخبارية سياسية شامله تقوم على التحليل والرأي ونقل الحقيقة كما هي. تقدم خطابا إعلاميا متزن، ويلتزم بوصلة وحيدة تشير إلى تحرير الإنسان في إطار يجمعنا داخل الوطن كله ولا يعزلنا

فوكس/ هويدا حمزة/ الكهرباء.. ياتحلوها ياتورونا جمال خطوتكم
ليلة امس انقطع التيار الكهربائي بعد العاصفة التي صاحبت المطرة الليلية واصلا (القطاع البقطع الكهربا) ده يشم ريحة المطرة طوالي ينتلا.
ثم بعد أن توقفت المطرة وهدات العاصفة عاد التيار الكهربائي لجميع الحي عدا بيتنا وبيت احد الجيران فاتصلت على أحد كوادر الكهرباء يسكن بالقرب منا واخبرته بما (حدس) وكنت من قبل قلت له (لو حصل لينا عطل بلم حريم الحلة ونجيك بالشباشب لا 4848 لا جرجرة فضحك وقال حبابكن الاف ولم يكن يقصر معنا في حلحلة مشاكل الكهرباء بالحي الله يجزيهو خير ولكنه بالأمس على غير العادة اعتذر وقال لي معليش يا أستاذة زي ما انتي عارفة الناس ديل مضربين
! مضربين 🙄 وكنت قد نسيت قصة اضراب العاملين بقطاع شركات الكهرباء تماما. طيب يا استاذ عندنا مرضى لا يتحملون الحر او البعوض وكذلك عندنا طالبات جامعيات ممتحنات بذاكرو الحل شنو؟
انا اسف يا أستاذة احمدي ربك انو قطعت منك اليوم في ناس قاطعة عندهم من 5 ايام ☹️
ياجماعة دي اخلاق شنو؟ 😏 البلد دي صابتها عين ولا شنو؟ في العهد (البائد) كما يسمونه تم ايقاف 4 موظفين عن العمل بسبب مماطلتهم في إصلاح عطل الكهرباء بعد ذهابنا لمكتب جبل أولياء للتبليغ المباشر لأنه 4848 كان فيهو جرجرة وروحك تطلع ورصيدك يخلص وانت في ال (Waiting) فقلت لاخي دور عربيتك وامشي مكتب جبل أولياء طوالي وبلغ خليهم يجو معاك لأنه كانت عندنا مريضة فشل كلوي(رحمها الله) وعندها أدوية في التلاجة بتبوظ فرفضو ناس الوردية استلام البلاغ الا عن طريق 4848 رغم الظرف الحرج للأسرة وكل مرة يقولون عربية الصيانة في الوردية لم تجي فردمتهم بعمود من النوع أبو كديس وجزاهم الله خيرا الزملاء في مكتب إعلام توزيع الكهرباء الذين تفاعلوا مع الحدث وساعدوني بالاتصالات ونقلت الواقعة وبدل عربية واحدة جات عربيتين اتعاقبن واحدة مشت والتانية جات🤩 حدث ذلك لماذا؟ لأنه كانت هناك جهات تحاسب وتعاقب ولكن الآن البلد ماشة ام فكو، لا يوجد من يحاسب، من حقهم ان يطالبوا بحقوقهم بشتى الوسائل٠ التي لا تمس حقوق العملاء، انا ضد الاضرابات في القطاعات الحيوية او المرتبطة بحياة المواطنين مباشرة لأنه ممكن مريض يموت لانه عندو جهاز تنفس صناعي يعمل بالكهرباء اواي دواء يجب ان يحفظ في الثلاجة فلماذا يتم عقابه بالإضراب والامتناع عن تقديم الخدمة التي اشتراها بنقوده؟ ماذنبه في تقصير الحكومة في حقوق العاملين؟ يعني المسكين تطير عيشتو الحكومة تعصرو لم يجيب الزيت وبعدين إخوته في البشرية أيضا يعصروهو😭.
على الحكومة إن وجدت حسم اضراب العاملين بقطاع الكهرباء فورا لأننا نزلزي الليل كلو بسبب الحر والبعوض واصبحنا كمان بلا موية للصلاة الا اتيممنا.
على إدارات شركات قطاع الكهرباء الوصول لحل عاجل مع العاملين تحت ادارتهم والا يورونا جمال خطوتهم والا ف (البل) واجب خاصة وان نذر الاعفاءآت قد تناقلتها الاسافير قبل ايام. 😎
