وجه الحقيقة

فوكس/ هويدا حمزة/ بنك فيصل وبنك الخرطوم شتان بين الثريا والثرى

بحاول اكون مؤدبة وانا بكتب في المقال ده لكن ما بوعدكم فربما اخرج عن النص حسب الأثر النفسي الذي تركه استيقاظي امس الأحد من (الدغش)لالحق إجراءات فتح حساب باسم صحيفتي بين يديكم في بنك الخرطوم ورغم ان تجربتي مريحة مع بنك فيصل وتطبيقه الراقي (فوري) وهو اسم على مسمى إذ فتحت حساب باسمي هناك لم يستغرق نصف ساعة حتى أصبح ساريا في فرع البنك بالحاج يوسف ش 1 الا أنني اضطررت لاقرر فتح حساب لدي بنك الخرطوم لأن جل الشعب السوداني أصبح يتعامل بتطبيق بنكك رغم اني والله ما بدورو ما بدورو مابدورو 10 مرات.لأنه التطبيق المفضل للحرامية والرجرجة والدهماء.
المهم وصلت البنك فرع محطة 13 بشرق النيل الساعة الثامنة بسبب الزحمة فوجدت البنك (مليان لي حلقومو ) فسالت إحدى الفتيات عن نافذة فتح الحساب فقالت لي (وين يااا الزمن انتهى) 😭
زمن شنو الانتهي نحن داخلين امتحان ولا شنو ؟ 😏) فقالت لي نحن جينا من 4 صباحا وبرضو ماحصلنا😭.
من 4🙄؟ ده فتح حساب ولا سحور؟
المهم قلت احنك المدير فذهبت وعرفته بنفسي وغرضي فاعتذر لي بعدم إمكانية فتح حساب اليوم وأساسا في مطلوبات مابتكوني جبتيها معاك قال لي. وكتر خيرو قام من مكتبه وذهب معي للموظفة المعنية بفتح الحسابات وطلب منها ان تكتب لي مطلوبات فتح حساب لاسم عمل فكتبتها ومن ضمنها عقد إيجار مقر!!! مقر🙄
يازولة انا جريدتي إلكترونية زي ما مكتوب في شهادة التسجيل ومقري (ويب سايت) وبشتغل في تلفوني يعني اجيب عقد إيجار من تلفوني ولا شنو 😂
– اسفة يا أستاذة دي ضوابط بنك السودان؛؛!
-الكلام ده زمااان يا اختنا ما تخليك زولة نمطية.
المهم لقد أسمعت إذ ناديت حيا وطلبت مني الذهاب للمدير وبالفعل ذهبت وبعد جهد اقنعته بالغاء شرط عقد الإيجار ولكنه ظل متمسكا بأن اعاودهم غدا لأن زمن فتح الحساب انتهى. يعني اقوم بكرة بدري الساعة 4 صباحا اكون في البنك وياعالم احصل ولا لا.؟
حملت أوراقي واتجهت صوب حلة كوكو وقلت إمكن القى مرونة هناك وفعلا المدير كان شخص لطيف خالص خالص الا انه ظل متمسكا بشرط عقد الإيجار واجيهم بكرة لأنه الزمن انتهى 😏يا استاذ الناس بقت بتأجر نص بيوتها عشان تعيش بيها انا اقوم أجر لي مقر لجريدة بشتغلها في التلفون؟ 🤔
طلب مني أن احضر عقد إيجار بيتي. وبما ان البيت خاص بزوجي فقد نصحني بعض الحاضرين بعمل عقد بواسطة محامي! عن طريق زوجي طبعا. 😎
يااخواني انا عاوزة افتح حساب في بنك الخرطوم ولا في الأمم المتحدة؟ 😏
قنعت تب واتصلت على نائب مدير بنك فيصل فرع الحاج يوسف ش1 الرجل الراقي االاستاذ قاسم وقلت له عاوزة افتح حساب لاسم عمل وماعندي عقد إيجار لأنه بشتغل من تلفوني. فقال لي (ماضروري تعالي الآن) لاحظوا ان هذه الآن كانت حوالي الساعة العاشرة وليس 4 صباحا ومن فوري اتجهت إلى هناك وتم إجراء فتح الحساب فقط بشهادة التسجيل وإثبات الشخصية بل ساعدوني في ملء استمارات فتح الحساب وربطوا حسابي الشخصي مع حساب الصحيفة بتطبيق فوري وكل ذلك لم يستغرق نصف ساعة لأنه الناس عارفة شغلها ومرنة تجاه الضوابط ومؤكد ان ضوابط بنك السودان قديمة وكان يفترض بالبنك تحديثها لأنو في ناس كده حرفيين ويلتزمون بالضوابط مهما كانت مجحفة ومتخلفة رغم انهم شباب يفترض ان يواكبوا المتغيرات في العولمة ولكنهم لا يفعلون لأنهم (خوافين) ووالله لو ماكنت خايفة من المعلوماتية كنت قلت في بنك الخرطوم ما لم يقله مالك في الخمر.
الظريف انني خرجت من بنك فيصل إلى اتحاد المصارف بالخرطوم لتغطية منتدى لجمعية حماية المستهلك بقيادة دكتور ياسر ميرغني بعنوان (نحو مجتمع غير نقدي) فذكرت واقعة بنك الخرطوم في مداخلتي وكان ممثلين لبنك السودان وخبراء مصرفيين من مؤسسات أخري حضور ورفع الجميع حاجب الدهشة عندما قلت ان البنك طلب مني عقد إيجار لصحيفة يشتغلوها في التلفون يعني نحن حا نتطور كيف في هذه الحالة 😂
غايتو لو ما كنت وعدتكم اكون مؤدبة كنت صرفت ليهم بركاوي 🤣
التحية لموظفي بنك فيصل فرع الحاج يوسف ش 1 مدير الفرع السنجك. ونائبه قاسم والصراف اسامه وعمر في خدمة العملاء
والعامل وليد ومن هذا المنبر ادعو إدارة بنك فيصل الرئاسة لتكريم هذه الكوكبة النشطة وتكريما مني وعرفان سانشر صورتهم في هذا الزاوية.❤️